Равил Харисов хатыны Ирина: “Ул беркайчан да йөрәгенә зарланмады. Ковид та түгел”

«Ул беркайчан да йөрәгенә зарланмады. Ковид та түгел. Бәлки тромб өзелгәндер дип уйлыйм инде. Аның аякларындагы веналарга операция булган иде. Авырмады да, авырта дип зарланмады да», — дип яза “Татар-информ” мәрхүм җырчының хатыны Иринага сылтама белән. 

Равил Харисов фатир түләүләрен түләп почтадан кайтканда урамда егылып җан биргән. «Ашыгыч ярдәм» килгәндә ул инде исән булмаган.

Җырчы белән хушлашу мәрасиме «Сәйдәш» мәдәният сараеның арткы ишегалдында булачак. Вакыты 11.00 сәгатьтә дип билгеләнгән.

«Әлегә җирләү урыны билгеләнмәгән. Әти-әнисе янына Яңа татар бистәсе зиратына җирләрбез дигән идек. Әмма анда җирләү мөмкинлеге юк диләр. Озату мәшәкатьләре белән Казан филармониясе шөгыльләнә», — диде Ирина Харисова.

Татарстанның халык артисты Равил Харисовка 72 яшь иде.