Россия мөселман эшмәкәрләре ассоциациясе белән Кырым бизнесменнары арасындагы эшчәнлек яңа дәрәҗәгә күтәрелде

Бу хакта Мөселман эшмәкәрләр ассоциациясе башлыгы Айдар Шаһимәрданов белән очрашуда комитет рәисе урынбасары, Кырымда һәм Севастопольдә РФ дәүләт милли сәясәтен тормышка ашыруны законнар белән тәэмин итү буенча комитет рәисе Руслан Бальбек сөйләде.

«Күп еллар эчендә Мөселман эшмәкәрләр ассоциациясе Россиянең иң зур һәм абруйлы ислам бизнес-бергәлеге булуын исбатлады. Оешма үзенең реаль эшләре белән эшкуарлык даирәсендә генә түгел, дәүләтнең дә ихтирамын казанды. Татарстан Республикасында уңышлы кулланылган РФ Мөселман эшмәкәрләр ассоциациясе тәҗрибәсен без Кырымда да тулысынча гамәлгә ашырырга телибез”, - диде Бальбек.

Аның сүзләренчә, төбәктә ислам нормаларына юнәлеш тоткан һәм хәләл җитештерүгә инвестицияләр кертергә әзер булган бизнесменнар кирәк.

«Кырым һәм Идел буе татарларын күпгасырлык тарих, дин бердәмлеге, тел һәм мәдәниятнең охшашлыгы бәйли», - диде Айдар Шаһимәрданов. Ул комитет ярдәме белән Кырым һәм Россиянең башка төбәкләре эшмәкәрләре арасында тыгыз бизнес-элемтәләр урнаштырырга мөмкин булыр, дип ышаныч белдерде.

Алар Татарстаннан Кырымга эшмәкәрләр һәм предприятиеләрнең бизнес-миссиясен оештырырга, шулай ук Кырымда ислам бизнесын үстерү буенча юл картасын эшләргә килештеләр, дип яза Татар-информ