«Салават күпере»ндә өй туе: «Яңа йортта бәхетле балалар тусын»

Йортны ачу тантанасына Татарстан Президенты каршындагы Дәүләт торак фондының эшләрне кабул итү һәм финанслау идарәсе башлыгы Владимир Никифоров та килгән иде. Аның сүзләренчә, бүген уникенче кварталның соңгы йорты тапшырылды. Яңа микрорайонның беренче чиратта төзелергә тиешле егерме ике йортның унсигезенчесе сафка баскан. Калган йортлар март ахырында тапшырылачак.

Йортның техник заказчысы – «Ак Барс Инжиниринг» җаваплылыгы чикләнгән җәмгыяте проекты җитәкчесе Вадим Морозов яңа фатирлы булучыларны котлап, йортыгыз һәрчак җылы, уңайлы булсын, диде. «Барсэлитстрой+» генераль подрядчигы вәкиле Җәүдәт Камалов та аның теләкләренә кушылды.
– Йорт төзелеше барышында без сезнең белән танышып-дуслашып беттек. Алга таба да без әле монда булачакбыз, теләсә кайсы теләкләрегезне җиткерә аласыз. Кимчелекләр булса, төзәтербез. Барысы да яхшы булыр. Бу матур йортта туасы балалар бәхетле булсын, әти-әниләр үзара дус-тату гомер итсен, әби-бабайлар хөрмәттә яшәсен, – диде ул.

Яңа фатирларын күрергә Нәкыя белән Азат Шәвәлиевләр дә килгән иде. Алар фатирны 2011 елдан бирле көткәннәр.
– Тулай торакта бер бүлмәдә биш кеше яшәдек. Өч улыбыз бар. Җәйгә күченергә уйлыйбыз. Тулай торак бүлмәсеннән соң өч бүлмәле фатир бик зур күренә. Улларыбызның ничек тә тизрәк шушында күчеп яшисе килә, – ди алар.

Григорьевлар гаиләсе дә өч бүлмәле фатир алган. Евгений белән Вероника ике ул үстерә. Алар да тулай торакта ун квадрат метрлы бүлмәдә яши. Евгений коткару хезмәтендә, ә Вероника балалар бакчасында бухгалтер булып эшли. Әлегә кечкенә улы белән декрет ялында.
 
– Вәгъдә ителгәнне өч ел көтәләр диләр. Без дә нәкъ өч ел дигәндә алдык бу фатирны. Бик зур, өченче катта, ике балконы бар. Бүген үк күчеп яшәргә була. Бу эшне озакка сузарга уйламыйбыз, мартларда биредә яши башларбыз дип уйлыйбыз. Кем кайсы бүлмәдә яшисен планлаштырып куйдык. Иртәгә үк мебельләр карарга кибеткә чыгарга уйлыйбыз. Күршедә генә балалар бакчасы бар, шунда ук мәктәп төзелеп бетеп ята. Сөенечебезнең чиге юк, – ди Вероника.

Гөлназ һәм Альфер Әхмәтвәлиевләр ике бүлмәле фатир алган. Алар әйтүенчә, булачак күршеләр белән алар ярты еллап ук танышкан.
– Социаль челтәрләрдә, “Ватсап”та үзебезнең төркемнәр бар. Йорт белән бәйле булган һәр яңалыкны шуннан белеп барабыз. Үзара аралашып, дуслашып беттек. Нинди мебель сайларга кирәк, кая заказ бирергә була – барысы турында да шунда сөйләшәбез, үзара киңәшләшәбез. Алга таба да шулай дус-тату яшәсәк иде, – ди алар.

Сүз уңаеннан: узган ел Татарстанда социаль торак программасында катнашучылар 9,5 меңнән артык фатир алган. Бүгенге көндә республикада  9 мең 387 гаилә (3 мең 975е – Казанда) торак шартларын яхшыртуга мохтаҗ. Алар арасында 7 мең 662 гаилә (3 мең 884е – Казанда) социаль ипотека программасында катнаша.

Илдар Мөхәммәтҗанов фотолары