Сайлауларга старт бирелде! Тавыш бирү сыйфатлы, ачык узарга тиеш

Татарстан үзәк сайлау комиссиясе рәис Андрей Кондратьев сүзләренчә, Россиядә барысы 108 млн кеше үзенең тавышын бирәчәк. Чит илдә яшәүче 2 млн кеше дә сайлауга кушылыр дип көтелә. 144 илдә 384 сайлау участогы ачылачак. Беренче сайлаулар Камчаткада кичә төнге сәгать унбердә үк ачылган. Ә Татарстанда сайлауларда 2,9 млн нан артык кешене көтәләр.
– Сайлаулар сыйфатлы, ачык узарга тиеш. Эчке эшләр министрлыгы, Роспотребнадзор, Сәламәтлек саклау һәм Мәгариф министрлыгы – барысы да сайлауларны тулы көченә уздырырга әзер. Тавыш бирүне максималь рәвештә ачык итәргә тырышабыз, моның өчен бик зур эш эшләнде. Чит илләрдән, Бәйсез Дәүләтләр Берлегеннән дә күзәтүчеләр килде, – диде ул матбугат очрашуында.
Спикер сайлау участокларында Роспотребнадзорның санитария-эпидемиология таләпләре үтәлүен дә билгеләп үтте.