“Сөлектән соң зур гематома чыкса, онкология дигән сүз”

Моннан тыш ул сөлек белән дәвалый, әкәм-төкәм белән бит тиресен яшәртергә булыша. Төп эше исә мәдәният өлкәсе белән бәйле. Ул районның мәдәният йортында эшли. 

Иҗат өлкәсендә эшләгән кеше ничек шулай халык медицинасы белән кызыксынып киткән соң? Бу сорауны аңа без генә түгел, бик күпләр бирә икән.

– Бала вакыттан ук медицина хезмәткәре булырга хыяллансам да, сәнгать юлын сайладым. Казанда театр училищесында укыдым. Соңрак Кукмарага кайтып, мәдәният йортына эшкә кердем. Сөлек белән әкәм-төкәм куюны акча эшләү максаты белән башламадым. Ул вакытта каенанам икенче районга сөлек куйдырырга йөри иде. Йөрергә ерак, интегеп йөрмә дип, сөлекне үзем куеп карыйсы иттем. Башта интернеттан видеолар карап куярга өйрәндем. Аннары махсус курсларда укып, сертификат алдым. Миндә ничектер тоемлау хисе көчле, эшләгәндә шуңа да таянам. Кулың шифалы, безгә дә сөлек куй әле дип, туганнар, дуслар мөрәҗәгать итә башлады. Менә шулай якыннарыма ярдәм итәргә тырышасым килүдән генә тотынган эш иде ул. Сихәтен күрдем дип, рәхмәт сүзләрен ишеткәч, кешеләргә файда китерүемә сөенеп куям, – ди әңгәмәдәшем. 

Регинаның әйтүенчә, гирудотерапия бик күп авырулар вакытында кулланыла. Шуның өстенә сөлекләр диагностика ясарга да булыша. 

– Сөлектән соң зур гематома чыга икән, ул кешедә онкология бар дигән сүз. Минем пациентларым арасында да шундый кешеләр очрады. Берәр җир әстерхан чикләвеге зурлыгында калкуланып чыкса, паразит авырулары бар дигәнне аңлата. Зур кызыл төстә дугалар чыса, димәк, ул кешедә аллергия, – ди сөлек куючы. 
Озак вакыт балага уза алмаучылар да сөлекнең файдасын күрә ди. Унике ел баласы булмаган ханым да әни булу бәхетенә ирешкән.  
Әкәм-төкәмгә килгәндә, ул кешенең тиресе өчен файдалы матдәләргә бай муцин бүлеп чыгара икән.

– Соңгы елларда әкәм-төкәм терапиясе бигрәк тә популярлаша башлады. Аны кешеләр үзләренә үзләре дә куя ала, махсус белем кирәкми. Моның өчен ахатин һәм альбинос дигән төрләре кулланыла, чөнки алардан муцин күбрәк бүленеп чыга, шуның өстенә тиз хәрәкәтләнәләр дә. Муцин бит тиресен яшәртеп һәм чистартып кына калмый, яра эзләрен дә бетерергә булыша. Күп кенә хатын-кызлар, төнге крем сөртмичә, битләренә унбиш минутка шул әкәм-төкәмне генә куеп торалар, – ди Регина. 

Сөлекнең селәгәе биологик актив матдәләргә һәм ферментларга бай. Менә аларның кайберләре:
Трипсин – ашкайнатуны яхшырта, аксымнар һәм углеводларны дөрес үзләштерергә ярдәм итә. 
Гирудин – тромблар барлыкка килүгә комачаулый, канның оешуын яхшырта. 
Катепсин – төрле характердагы шешләрнең таралуын һәм үсүен баса торган аксым. 
Гиалуронидаза – тукымаларны тукландыра.  
Аңарда инфекцияләрдән саклый торган бактерияләр дә бар.