#Язмалар 18 мая 2020, 10:09

Спорт залына һәм музейларга йөрергә рөхсәт ителде

18 мая 2020, 10:09

Бүгеннән, ягъни 18 майдан Татарстанда спорт үзәкләре, фитнес заллар һәм йөзү бассейннары ишекләрен ачарга мөмкин. Әлеге эшчәнлекне рөхсәт иткән ТР Хөкүмәте карары дөнья күрде.

Скопировать ссылку

Аларда персональ тренер белән шөгыльләнергә була. Әмма тренерга берүк вакытта бары бер кеше белән генә шөгыльләнү шарт итеп куела.

Профессиональ спортчылар ачык һавада тренировкаларын яңарта ала. Гади гражданнарга да спорт белән шөгыльләнү рөхсәт ителә. Әмма парклар һәм ишек алларында урнашкан спорт мәйданчыкларында, балалар мәйданчыкларында шөгыльләнү рөхсәт ителми. Берүк вакытта 2 кеше спорт белән шөгыльләнә ала, әмма алар арасында 5әр метр ара калдырылган булырга тиеш.

Шулай ук музейлар, китапханәләр дә эшчәнлекләрен яңартырга хокук ала. Музейларда биш кешедән артмаган төркемнәр өчен экскурсияләр уздыру да рөхсәт ителә. Экскурсоводның махсус радио җиһазы бар икән, ул очракта, экскурсиягә 10 кеше алырга була.

ТР мәдәният министры Ирада Әюпова сүзләренчә, музейлар куелган таләпләрнең барысын та төгәл үтәп, эшчәнлекләрен башлый.

-Без хәлнең җитдилеген бик яхшы аңлыйбыз һәм радиоҗиһазлар икенче тапкыр файдаланганда санитар эшкәртү узачак. Музейларда битлек, пирчәткә һәм бахиллар кию, тән температурасын тикшерү дә контрольдә булачак. Биналарны җилләтү, дезинфекцияләү таләбе дә үтәлергә тиеш, - диде Ирада Әюпова.

Кызыклы яңалыкларны күзәтеп бару өчен Телеграм-каналга кушылыгыз.