“Сугыш уты бүтән безнең җирләргә беркайчан килмәсен”
Рөстәм Миңнеханов Җиңү паркында совет сугышчысына һәйкәл ачты.
Рөстәм Миңнеханов Җиңү паркында совет сугышчысына һәйкәл ачты.
“Җиңүчеләргә карата тирән ихтирам уртак. Өлкәннәр өчен Җиңү көне изге бәйрәм, яшьләр күңелендә дә ул шулай кереп калыр дип ышанам. Сугыш уты бүтән безнең җирләргә беркайчан килмәсен, ә Җиңү байрагы гел шулай җилфердәп торсын!” – Казанның Җиңү паркында совет сугышчысына һәйкәл ачылышы вакытында Татарстан Президенты Рөстәм Миңнеханов шулай дип белдерде.
Республика лидеры яңа һәйкәлнең образы буларак, 1945 елның 30 апрелендә Рейхстаг түбәсенә Кызыл Байракны кадаган татар улы Гази Заһитов сайланганын искәртте.
– Бу һәйкәл Бөек Ватан сугышы фронтларда көрәшкән барлык татарстанлылар өчен. Сугышка киткән 700 мең кешенең һәр икенче кешесе Ватан өчен көрәштә һәлак булган. Алар турында хәтер йөрәкләрдә мәңге сакланачак! — диде Рөстәм Миңнеханов.
Тантанада онлайн форматта катнашкан Советлар Союзы Герое Борис Кузнецов үзенең 16 яшьтән немецларга каршы сугышканын әйтте. «Бүген без 75 еллыгын билгеләп узабыз. Бу тарихи датага бөтен кешелек әзерләнә. Без сугыш ветераннары шуның белән бәхетле, немец фашист гаскәрләрен тар-мар итә алдык», — дип белдерде ветеран.
Тантанада, шулай ук, Татарстан Республикасы Дәүләт Киңәшчесе Минтимер Шәймиев, Татарстанның Дәүләт Советы рәисе Фәрит Мөхәммәтшин, Татарстан Премьер-министры Алексей Песошин, Казан мэры Илсур Метшин да катнашты.
Татарстан җитәкчелеге Җиңү паркында Мәңгелек ут һәйкәленә чәчәкләр салды. Рәсми затлар, шулай ук, хәрби техниканы карады, Тыл хезмәтчәннәренә, Аналарга һәм тол хатыннарга багышланган һәйкәлләргә чәчәкләр салдылар.
Чыганак: “Татар-информ”
Фото: tatarstan.ru
Кызыклы яңалыкларны күзәтеп бару өчен безнең МАХ каналына кушылыгыз.
Комментарийлар