Сыерларны көтүгә чыгаруны кайчан туктату яхшы?

Ә кайбер районнарда хәзердән үк көтү чыкмый икән инде. Мәсәлән, Лаеш районының Хәерби авылында гомер итүче Татарстанның атказанган агрономы Шамил Кушмин “ШК” хәбәрчесенә әйтүенчә, Хәербидә хуҗалык көтүе 15 сентябрьдә үк туктаган инде.

- Дөрес, элек ашатырга ризык аз булганда, сыерларны көтүдә кар яуганчыга кадәр тоталар иде. Хәзер терлек азыгы җитәрлек, шуңа күрә сентябрь урталарында ук туктатуны хуп күрәләр.
Беренчедән, хәзер салкыннар, яңгырлы көннәр башлана. Бу маллар өчен яхшы түгел. Мондый көннәрдә җиленнәре яргаланып, авырырга мөмкиннәр. Икенчедән, көтүлектә контроль азрак, ә монда, утарда, күз алдында торалар. Өченчедән, көзге чорда малларны күпьеллык үләннәр (люцерна, клевер) чәчелгән басуларга кертәләр. Коры көннәрдә соңрак чәчелгән үләннәргә зыяны булмаса да, яңгырлы һава шартларында алар тапталып, үләннәргә зыян салына.  Югыйсә, элекке елларда мондый басуларга малкайларны бөтенләй дә кертмиләр иде. Заманалар белән бергә тәртипләр дә үзгәрә, - диде тәҗрибәле белгеч.  

Зөлфия Хәлиуллина фотосы