Сынмас рух үрнәге: Казанда Вера Бакаева хөрмәтенә кичә узды

Вера Георгиевна Бакаева — язмышы гаять катлаулы булган шәхес. Нибары 7 яшендә ул фашистлар кулына әсирлеккә эләгә. Кечкенә кызның күз алдында әти-әнисен үтерәләр. Тоткын балалар өстендә фәнни тәҗрибәләр уздырылган лабораториядә аңа: «Син йә бала таба алмаячаксың, йә балаң зәгыйфь туачак», — дип куркыту сүзләре әйтелә. Шулай да Вера исән кала. Авыр кичерешләрдән соң ул хәтта үз исемен дә оныта, һәм госпитальдә генә аңа Вера дигән исем бирәләр.

Яңа тормышын ул Чурилино авылындагы интернатта башлап җибәрә. 9 яшеннән үк мех фабрикасында эшли башлый. Вакыт узу белән тормышы җайлана: ул кияүгә чыга, өч бала үстерә. Әмма язмыш аны янәдән сынауга дучар итә — улы 26 яшендә, икенчесе 33 яшендә, кызы 38 яшендә вафат була. Бүген Вера апаның иң зур куанычы — оныгы. Олы яшьтә булуына карамастан, ул актив тормыш алып бара: 95 яшендә дә махсус хәрби операциядә катнашучылар өчен табигый туннан киезләр ясый. Аның тормыш юлы — ныклык һәм бирешмәү үрнәге.

Кичә «Волжские зори» — Идел буе районы инвалидлар җәмгыяте хоры чыгышлары белән үрелеп барды. Җыр-моң, шигърият һәм истәлекләр чарага аерым җылылык өстәде. Үзәк җитәкчесе Мансур хәзрәт Җәләлетдин волонтерларга рәхмәт хатлары һәм медальләр тапшырды.

Чара ахырында катнашучылар өчен «Кызыл ромашка» исемле мастер-класс оештырылды. Аның кысаларында һәркем солдатларга теләкләрен язып калдыра алды. Шулай итеп, кичә төрле буын вәкилләрен берләштергән, файдалы һәм мәгънәле вакыйгага әверелде.

«Батырлар терәге» ресурс үзәге күптән түгел генә оешуга карамастан, бүген инде дистәләгән хәрбиләргә һәм аларның гаиләләренә даими ярдәм күрсәтә. Биредә төрле мастер-класслар, очрашулар үткәрелә, гуманитар ярдәм җыела. Волонтерлар маскировка челтәрләре үрә, шәмнәр ясый, камуфляж киемнәр һәм юрганнар тегә.

Волонтер Әлфия Хәбибуллина билгеләп үткәнчә, сугыштан яраланып кайткан ир-егетләр еш кына рухи сынаулар аша үтә. Кайчак бу хәлләр гаиләләргә дә тәэсир итә. Мондый очракларда оешманың психологлары ярдәм күрсәтә. Шулай ук дин әһелләренең дә роле зур. «Нәкъ менә хәзрәт һәм руханиларның вәгазьләреннән соң солдатлар яңадан яшәргә көч таба», — дип ассызыклады ул.

Алинә Фәхретдинова