Шамил Садыйков: «Бүгенге көндә татар телле журналистларга ихтыяҗ зур»

2020 елда "Татмедиа" АҖ генераль директоры Шамил Садыйков тәкъдиме буенча әзерләнгән программа белән укыту быел да дәвам итәчәк. Аның нигезендә, студентлар атнаның биш көнендә белем алалар, бер көнендә “Татмедиа” агентлыгында практика узалар. Әлеге эш тәҗрибәле журналистлар канаты астында башкарыла.

"Кызганычка каршы, соңгы елларда КФУда татар телле журналистларны бюджет урыннары нигезендә әзерләү юк дәрәҗәсендә иде. Без татар журналистларын әзерләүне үз кулыбызга алдык. КФУ белән берлектә яңа укыту программасын ясадык. Татар телен камил белгән бала бюджет хисабына журналист була ала. Иң мөһиме — эш таба ала, чөнки эш урыны инде көтеп тора», - ди Ш.Садыйков. Аның фикеренчә, бүгенге көндә татар телле журналистларга ихтыяҗ зур, чөнки татар телендә эшләүче йөздән артык мәгълүмат чарасының барысына да кадрлар кирәк.

КФУда быел барлыгы 460 бюджет (былтыргы белән чагыштырганда, 39га күбрәк), 600дән артык түләүле урын әзерләнгән. “Институт буенча алганда, иң зур конкурс чит тел белгечлекләре буенча. Бер урынга 40-50 гариза туры килә,” – дип сөйләде Рәдиф Җамалетдинов.

Дания Нәгыйм