«Телефонын алып, тәрәзәдән сикергән. Әнисенә шалтыратып, “янабыз, мин тора алмыйм” дигән...»

Янгын вакытында өйдә калган кызлары Алия икенче каттан сикереп, умырткасына зыян китергән. Ул хастаханәдә, операция кичергән.
Гөлфия - "Сөембикә" журналында эшләүче коллегабыз Гөлнур Сафиуллинаның бертуган сеңлесе. Янгын хакында без аннан белдек.
-         Бу хәл кичә таң алдыннан булды, - дип сөйләде ул. - Авыл изрәп йоклый торган вакыт. Ишетүче дә, күрүче дә булмаган. Күршеләр дә берни сизмәгән. Сеңлем Гөлфия төнге сменада эштә иде. Киявебез Илдус беренче катта йоклаган, кызлары Алия – икенче катта. Алия төтен исенә уянган. Хәлне шунда ук аңлап, телефонын алып, тәрәзәдән сикергән. Әнисенә шалтыратып, “янабыз, мин тора алмыйм” дигән. Телефонын үзе белән алмаган булса, әтисе дә исән калмаган булыр иде дибез. Илдус тә уянган, әмма сөрем исеннән исереп, ишек төбендә егылган. Гөлфия хезмәттәшләре белән кайтып җитеп, аны алып чыга алганнар. Ул Кайбыч хастаханәсендә ята. Алиябез Казанда республика клиник хастаханәсендә, аңа операция ясадылар. Әлегә бернинди фаразлар да әйтеп булмый. Яшь кеше, тиз арада тернәкләнеп китәр дип ышанабыз. Табиблар да өметне кисмиләр.

Үз тырышлыклары, хәләл көчләре белән төзеп чыккан йортлары яшәрлек хәлдә түгел. Ике Коръәннән кала, өйдә булган бөтен нәрсә янып беткән. “Аллаһның бер могҗизасы бу – Коръәннәргә берни булмаган, хәтта сөремгә дә буялмаганнар”, - ди Гөлнур.   

Илдусның да, Гөлфиянең дә ике яклап туганнары җыелышып кайтып, шул ук көнне янган нигезне чистартканнар. Йортның янган диварларын сүтеп, яңасын тергезергә кирәк.
“Сынау арты сынау кичәбез. Бер дә көтмәгәндә әтиебез дә китеп барды. Яңарак кына әтинең кырыгын уздырдык. Ул хәсрәттән әле айнып та җитмәгән идек. Тагын зур сынаулар алдында калдык. Бу көннәрдә күңел тынычсызланды. Гөлфия дә шулай ди. Тик без аны әтинең китүе, әнинең бүгенге хәле белән бәйләдек. Ә ул исә шушы хәсрәткә булган икән”, - ди Гөлнур.

Җир йөзендә киң күңелле, олы йөрәкле, мәрхәмәтле кешеләр күп. Тамчыдан күл җыела, диләр. Ганиевләр гаиләсенә бердәм булып азмы-күпме ярдәм күрсәтсәк иде. Ярдәмегезне 89172605683 телефон номеры буенча күчерә аласыз: Ганиева Гульфия Мударисовна (Сбербанк).
«Назначение платежа» дигән юлны буш калдырыгыз яки «подарок» дип языгыз. Бу – картаны блокировать итмәсеннәр өчен кирәк.
Ярдәмегез үзегезгә меңе белән әйләнеп кайтсын!