Удмуртиядә «Татар кызы-2022» республика бәйгесенең финал өлеше узачак

Яңа ел каникулларыннан соң кызлар макияж һәм фотога төшерү нигезләре буенча мастер-класс үттеләр. Конкурс вирзажисты Анна Тарасова катнашучыларны мөстәкыйль рәвештә мөлаем образ тудырырга өйрәтте, ә модель мәктәбе җитәкчесе Гөлназ Ибраева матур фотосурәтләр ясау серләрен ачты. 20 февральдә катнашучылар Удмуртия Милли китапханәсендә узган һөнәри фотосессия вакытында үзләренең яңа күнекмәләрен сынап карый алдылар.

Моннан тыш, конкурсантлар социаль челтәрләрдә туган тел көненә багышланган флешмобта да катнаштылар, татар телендәге яраткан әсәрләрен укыдылар.
Конкурс финалына кадәр татар гүзәлләрен бай чаралар программасы көтелә. Кызлар калфак ясау һәм төрле бизәкләр төшерү өстендә эшләячәк, күренекле татар эшлеклеләре, артистлар белән очрашачак. Март аенда кулинария буенча һәм интеллектуаль этаплар да уздырыла.

“Татар кызы” юбилей конкурсында катнашу өчен 30 гариза килгән иде. Жюри 12 кызны сайлап алды. Барлык этаплар нәтиҗәләре буенча финал өлешендә 8 кыз катнашачак.

Шунысы да искәртик: «Татмедиа» АҖ, «Шәһри Казан» һәм «Без бергә» газеталары әлеге конкурс-бәйгенең мәгълүмати партнеры булып тора. http://shahrikazan.ru/ сайтында кызлар өчен тавыш бирү нәтиҗәсендә иң күп тавыш җыйган конкурсант «Татмедиа» АҖ һәм «Шәһри Казан» газеталарының махсус бүләкләренә ия булачак. Тавыш бирү 31 март, көндезге 12.00гә кадәр дәвам итәчәк.