Ул рекордсмен, 5 бала әнисе, шагыйрә...
Аңа барысы да безнең “йолдыз” дип дәшә. Исеме дә җисеменә туры килә бит! Тукай клубында күренекле шагыйрә, журналист, Татарстанның атказанган сәнгать эшлеклесе Йолдыз Шәрапованың юбилей кичәсе узды. Туган көне апрель аенда булса да, икенчесе килеп җиткәнче бәйрәм итү начармы?
Аңа барысы да безнең “йолдыз” дип дәшә. Исеме дә җисеменә туры килә бит! Тукай клубында күренекле шагыйрә, журналист, Татарстанның атказанган сәнгать эшлеклесе Йолдыз Шәрапованың юбилей кичәсе узды. Туган көне апрель аенда булса да, икенчесе килеп җиткәнче бәйрәм итү начармы?
Йолдыз Шәрапова Буа районы Яңа Тинчәле авылында туып-үскән. Ул – бар гомерен иҗатка, журналистикага багышлаган шәхес. Бүген аның мәкаләләре “Шәһри Казан” газетасы битләрен бизи.
– Иҗат өлкәсендә төрле кешеләр бар. Кемдер исем, урын өчен йөри, ә укучы өчен иҗат итүчеләр алтын бәясенә тиң. "Татмедиа" газета-журналларында Йолдыз апа 1984 елдан бирле эшли. Ул – рекордсмен, уңга-сулга китмичә, журналистика өлкәсендә фидакарь хезмәт куйган кеше, – диде Татмедиа АҖ генераль директоры Шамил Садыйков.
Йолдыз апа танылган балалар язучысы да бит әле. Аның шигырьләрендә яшь буын тәрбияләнә. Чарада Йолдыз Шәрапованың нәни “фанат”лары да чыгыш ясады. Алар аны үзләренең якын дусты итеп кабул итә. Йөгереп килеп кочаклап та алалар.
– Балалар саны чыннан да күп, безнең арада шундый алтын куллы язучылар булганга шатмын. Әти-әни сүзе үтмәсә, язучылар нәни күңелгә ачкыч таба ала. Йолдыз апа - нечкә күңелле шәхес. Балаларны алдап булмый бит, алар Йолдыз апаны күрү белән буе җитмәгәч, ботыннан кочаклый, – дип әйтте Татарстан Республикасы мәгариф һәм фән министры урынбасары Минзәлия Закирова.
Юбилей кичәсендә Йолдыз Шәрапованың якын дуслары, балалар бакчалары хезмәткәрләре, группадашлары, шагыйрьләр һәм җәмәгать эшлеклеләре катнашты. Алар Йолдыз апа турында истәлекләр белән бүлеште. Шунысы хак: Йолдыз апа алтмышын тутырса да, тиктормас, балалар сөючән, җилдәй җитез булып кала. Аның кебек шәхес белән бергә эшләвебез белән без дә горурланабыз.
– Йолдыз тормышта да, эштә да балачак илендә яшәгән бәхетле кеше. Без 1988 елда таныштык, "Яшь Ленинчы"да бергә эшләдек. Ул әнисенең бердәнбер кызы иде. Йолдыз зур гаилә корырга теләде һәм бу хыял чынга ашты. Балалар өчен язу иң авыры. Йолдыз дөньяны балалар кебек күрә белә. Аларның күңелләренә юл таба, – диде шагыйрә Илсөяр Ихсанова.
Йолдыз Шәрапова - 5 баланың иң газиз кешесе дә. Аны котлап, сәхнәдә улы Сәйдәш Шәрапов җыр башкарды. Йолдыз Шәрапова Татар конгрессының иң зур бүләге – миләткә күрсәткән хезмәтләре өчен орден белән бүләкләнде.
– 60 яшь апрельдә үк узды бит, хәзер кичә үткәрү читен булмадымы?
– Юк, бер читенлеге дә булмады. Бу бит юбилей түгел, иҗатымны сөючеләр, мине хөрмәт итүчеләр белән очрашу булды. Аларның котлау сүзләрен, бүләкләрен һәм чәчәкләрен иҗатым өчен дип кабул иттем.
– 60 еллык тәҗрибәгездән чыгып, тормышта иң зур сабагыгыз нинди иде?
– Булды инде. Тезне, борынны канатканнар да, баш исән бит. Дусларның хыянәтен дә кичердем. Мин ачуны озак сакламыйм. Барысы да үткәндә калды. Ясалма була белмим, бар эшемне үземчә башкарам. Уйнауны да булдыра алмыйм, ирем, Сирин дә хәйләлә инде әзрәк дип әйтә. Килеп чыкмый. Ничек бар шундый. Ихласлылык – иң зур иман.
Илгизә Галиуллина
.jpeg)
Вход на сайт
Язмага реакция белдерегез
Мөһим
-
#Спорт
2026 елда мас-рестлинг буенча дөнья чемпионаты Казанда узачак
-
#Сәясәт
Фәрит Мөхәммәтшин: «Төркия Республикасы парламенты Татарстан Дәүләт Советының беренче чит ил партнеры булды»
-
#Шоу-бизнес
«Әлегә ышана алмыйм…»: композитор Марат Мухин әтисен соңгы юлга озатты
-
#Мәдәният
Чорлар аша аваз салган хәтер: Тукай нигезеннән башланган язмыш
-
#Җәмгыять
Айгөл Габдрахманова: «Сәләт аланнарына әзерлекле кадрлар җәлеп итә»
Комментарийлар
0
0
Йолдыз апа! 😘❤️ Якты күзләрегездән елмаю һәм шатлык китмәсен. Чын күңелдән сәламәтлек, бәхет, озын гомер телим.
0
0
0
0
Йолдызым, котлыйм зур бүләк - орден алуың белән. Татарстан конгрессында эшләүчеләргә Алланың рахмәте яусын Йолдызның иҗатын танып зур бәя биргән өчен.
0
0
0
0
Йолдыз ханымны юбилее белән чын күңелемнән котлыйм. Иҗади уңышлар, сәламәтлек, гаилә бәхете телим. Татар илендә, татар дөньясында дәрәҗәле кеше булса да, ул һәркемне үз тиңе итеп күрә белә. Аның белән очрашканнан соң, дөньяга икенче төрле карый башлыйсың, рәхәт булып китә, нинди дә булса яхшылык эшлисе килә, күңел күтәрелә. Кызганыч, юбилейга бара алмадым. Бик тә катнашасым килгән иде. Алдагы көннәрдә очрашырга насыйп булсын! Суфия МОСТАФИНА
0
0
0
0
Йолдыз апа ! Аллаһ Раббыбыз изге гамәлләрегезне кабул кылсын!Барыгызга да хәерле гомерләр насыйп итсен!
0
0
0
0
Йолдызга. Ачык йөзле шагыйрә- Безнең Йолдыз була ул. Исеме-җисеменә Бигрәк туры килә шул! Йолдыз кебек сибелә Шигырьләре каләмнән. Илһам ала ахрысы Ерактагы галәмнән! Җемелдәшеп янсын, әйдә, Зәңгәр күктә йолдызлар. Күңел түрен яктыртучы- Җирдә безнең Йолдыз бар!
0
0