"Унбер" лицее директоры: "Уку елы башланып, бер ай узуга татар теле төркеменә өстәмә 20 кеше килде"

Казанның “Унбер” лицее директоры Алмаз Хәмидуллин шундый фикердә. Ул үзе математика буенча белгеч. “Ел укытучысы” бәйгесендә катнашып, җиңү яулаган укытучы да әле. Казан мэриясе башлап җибәргән татар теле укытучылары өчен семинарларның Алмаз әфәнде җитәкләгән лицейда башланып китүе дә юкка түгел. Биредә ул креатив, яшь, амбицияле татар теле укытучыларын туплаган. Моның беренче нәтиҗәләре дә күренә инде.

“Уку елы башланып, бер ай узуга татар теле төркеменә өстәмә 20 кеше килде. Күп сөйләргә, төрле әйберләр хакында сөйләргә мөмкин. Әмма балалар үзләре татар теле төркеменә килергә теләк белдерәләр икән, бу минем өчен иң мөһиме. Бу ике-өч бала гына түгел бит. Әле тагын 20 се күчү турында уйлап йөри, ә калган 20 се инде әзердер дә. Бу нәрсәдән килеп чыга? Миңа калса, кызык булганга! Балаларга урамга китаплар белән чыгарга кызык. Күз алдыгызга китерегез, балалар урамга чыгып, китап укый! Икенче бер укытучы дәресне чәкчәкләр, чәйләр белән үткәрә. Бу да балаларга кызык. Балалар үзләренә кызык булганга килә”, - ди Алмаз Хәмидуллин.

Әйе, хәзерге заман баласын парта артына утыртып, китап белән генә укыту мөмкин түгел. Инде 200 елларда дәресләргә керә башлаган проекторлар гына да аларда кызыксыну уятмый. Хәзерге заман баласына хәрәкәт, динамика кызыклы.

Татар теле бетә, үлә дибез. Әмма аны саклар өчен искечә укытудан китәргә, яңа ысуллар табарга, Алмаз әфәнде әйткәнчә, кызыксыну уятырга кирәк.

Семинарда шул мәктәпнең татар теле укытучысы Гөлфия Габдуллаҗанова мастер-класс күрсәтте. Аның дәресе шундый җанлы, кызыклы. Укучының игътибары бер минутка да читкә китми. Укытучы дәреснең беренче минутыннан ук баланы темага алып кереп китә. Сүз уңаеннан, Гөлфия Габдуллаҗанова да кайбер дәресләрен урамда үткәрә икән. Бала бердән саф һава суласа, икенчедән хәрәкәттә. Аннан, предметларны, әйберләрне күреп, тотып караган очракта, аларның татарча атамаларын истә калдыру җиңелрәк бит.

Казан Башкарма комитеты җитәкчесенең социаль мәсьәләләр буенча урынбасары Гүзәл Сәгыйтова да хәзерге заманда уку-укыту процессының аерылуын таный.

“Сез булганга телебез яши. Сезгә карыйбыз, сездән таләп итәбез һәм сезгә ышанабыз да. Әлбәттә инде еллар буе бер предметны укытып, яңа илһам аласы килә, яңа дәрт аласы килә. Ул һәрбер эштә шулай. Бу семинарлар да сезгә дәрт бирсен, илһам өчен эшләнелде. Яшьләр ничек эшли, аларның нинди тәҗрибәсе бар. Телибезме-юкмы, әмма яңа буын ул башка”, - диде ул.

Татар теле укытучылары өчен семинар Татарстанда Туган телләр һәм халыклар бердәмлеге елы уңаеннан оештырыла. Семинарлар ноябрь һәм декабрь айларында да үткәреләчәк.