Ут телләре кеше гомерен өзгән

- Бер хуҗалык эчендә апалы -сеңелле Фирдәвес апа белән Фирдания апа яшәде, - дип сөйләде безгә Биектау авыл җирлеге башлыгы Ильмир Камалиев, - Аларның һәркайсының үз йорты иде. 63 яшьлек Фирдәвес апа кечерәк өйдә яшәде, ул чирләде, соңгы арада урын өстендә булды. Сеңлесе Фирдания апаның үз йорты, гаиләсе, апасын гел карап, булышып яшәде. Кичен авылда төзелүче балалар бакчасы һәм мәктәп биләмәләрен карарга чыккан идем, шунда кешеләр йөгерүен күреп алдым, Фирдәвес апаның йорты яна диделәр. Җирлекнең үз янгын машинасы бар, ул Яңавылда гаражда тора иде, аны тизрәк китерттек, шул арада күрше Котлы Бөкәштән дә ут сүндерү машинасы килде ярдәмгә. Ут телләре абзарга күчкән иде инде. Авылда торак йортлар бер-берсенә якын тора, утның башка өйләргә дә күчү ихтималы зур. Шуңа район үзәгеннән КаМАЗ янгын сүндерү машинасы да килде. Шулай итеп, өч машина эшләде янгын сүндерүдә. Кичке тугызда янгын бетерелде. 

Ут сүндерүчеләр торак йортны тикшергән вакытта үле гәүдәгә тап булалар, Фирдәвес апа була бу. Шул арада полициянең участок уполномоченные Россия Тикшерү комитетының Татарстан буенча Тикшерү идарәсенең Балык Бистәсе районара тикшерү бүлеге тикшерүчеләрен чакырган.

- Фирдәвес апаның гәүдәсен криминаль үлем түгелме-юкмы икәнен белү өчен судмедэкспертиза үткәрергә алып киттеләр. Янгында тончыгып үлгән диелгән иде алар биргән кәгазьдә, бүген мәрхүмәне җирләдек, - диде Камалиев. Беренчел фаразлар буенча, ут электр чыбыкларының төзексезлеге аркасында килеп чыккан. Тикшерү бара. 

ЛИЛИЯ ГАЙНУЛЛИНА