Ватрушка белән шуу модага кергәннән соң, балалар арасында имгәнү очраклары 3 тапкырга арткан

Табиб әйтүенчә, имгәнүләрнең сәбәбе – дөрес егыла белмәү, куркынычсызлык кагыйдәләрен үтәмәү, тиешсез урында шуу.

– Кайсы спорт төре аеруча куркыныч икәнен аерып әйтә алмыйм. Бер шахматчы иң куркыныч спорт төре дип шахматны атаган. Чөнки уен вакытында утырган урындык аягы сынып, кул-аягын имгәткән, имеш. Хәвеф-хәтәр теләсә кайда сагалап тора. Кар атып уйнаганда, катырак кисәк битне җәрәхәтләргә мөмкин. Тимераякның размеры зуррак булса, аякка зыян килүе бар. Ничек кенә булмасын, баланың имгәнүендә беренче чиратта әти-әнинең игътибарсызлыгы гаепле. Икенчедән, балалар еш кына юлда барганда да телефоннарыннан аерыла алмый, колакчыннар кия. Кулны кесәгә тыгып йә телефон тотып йөрү бик куркыныч, егылганда, кеше һәрчак таянырга әзер булырга тиеш, – ди Алексей Глушков.

Республика клиник хастаханәсенең 2нче травматология үзәгендә кабул итү бүлеге җитәкчесе Сәяр Сираҗетдинов әйтүенчә, урамда имгәнү очраклары зурлар арасында да кыш көне ике тапкырга арта. Имгәнүләрнең 20 проценты инвалидлыкка китерә. Зыян күрүчеләрнең күбесе – эшкә сәләтле кешеләр. Күп очракта юллар чистартылмау, бозлавык, автобуска кергәндә-чыкканда егылып имгәнәләр. Ә иң төп сәбәп – ашыгу. «Кеше, соңга калам дип, хәтта ялтырап яткан бозны да күрми»,– ди Сәяр Сираҗетдинов.
Хастаханәгә тимергә теле ябышып калган балаларны да еш китерәләр икән. Бу балачак шуклыгы мәзәк тоелса да, сәламәтлеккә зыян китерә. Ни хикмәт, кышын тимер ялап караучылар арасында өлкәннәр дә очрый.

Имгәнгәндә беренче ярдәм

Беренче чиратта, дөрес егылырга тырышыгыз: аяк-кулларны буыннардан бөгеп, гәүдәне бераз алга игән рәвеш алыгыз, җайлы булса, кулларга таянырга була, мөмкинчә, аркага егылмаска тырышыгыз. Имгәнгәнсез икән, авыртуны басарга кирәк, имгәнгән урынга салкын (кар, боз) куегыз. Баланы беренче эш итеп тынычландырырга кирәк, авыртуны баса торган дарулар бирергә ярамый. Сынган урынны тартмагыз, умагыз, селкенмәслек итеп бәйләп куйсаң яхшы.

Һич кенә дә үз белдеклегең белән дәваланырга ярамый, ашыгыч ярдәм хезмәте чакыртырга кирәк. Татарстанда имгәнгәндә беренче медицина ярдәме күрсәтә торган пунктлар эшли.