Җәвит Шакиров ТНВда чыгачак яңа тапшыруы турында: «Мин аны акча өчен эшләмим»

- Җәвит абый, тиздән яңа тапшыру алып бара башлыйсыз икән.
- Әйе, бик кызыклы юмористик тапшыру булачак. Анда 4-5 кызыклы рубрика. Мәсәлән, шуларның берсе – матбугатта чыккан яңалыкларга кызыклы комментарийлар бирү. Ютубтагы көлкеле видеоларга да күз салачакбыз. Тапшыруга килгән кунаклар да юмор хисле, шаяра белергә тиешләр. Шундыйларны гына чакырачакбыз. Тапшыру сценарий буенча бармый, анда гел импровизация булачак. Кыскасы, бик җиңел, тамашачы ярата торган тапшыру булачак.

- Ә ник “Башваткыч”ны калдырып киттегез? Ул тапшыру да сезгә бик килешә иде бит!
- Мин бертөрлелекне яратмыйм. “Кабатланулар башланса, шундук китәм”, - дип, ул эшне башлаган вакытта ук әйткән идем. Яшьләргә калдырып киттем, рәхәтләнеп эшләсеннәр!

Әмма “Башваткыч”ны сагынам дип әйтә алмыйм. Көн дә баш ватып йөрибез болай да! Гастрольләрдән кайтып та кергән юк. Әмма заманында “Башваткыч”ның рейтингы бик югары иде. “Җәвит-кәмит”неке дә шулай булыр дип ышанам.

- Импровизация булгач, авыр түгелме? Дубльләр еш кабатланамы?
- Юк, мин туктатканны яратмыйм. Бер төшерә башлыйбыз икән, ахырына кадәр! Юморны кабатлап, тиешлечә дәрәҗәдә җиткереп булмый. Ул беренче дубльдән эшләнә торган әйбер.

Гомумән, минем теләгем – тапшыру матур итү. Тамашачылар ТНВ каналын ачып, тәнкыйтльләрлек булмасын. Бездә дә төрлелек бар, бездә дә рәхәтләнеп карый торган, туган телдә чыккан тапшырулар бар һәм булырга тиеш.

- Ә ТНВ Сезгә эш хакы түлиме соң?
- ТНВга мин телеканалны яраткан өчен барам, ә акча өчен түгел.  Эшемне күрсәтим әле, аннары түләрләр. Әйбәт итеп эшләсәң, бәясе дә әйбәт була аның. Анысы өчен борчылмыйм. Андый гадәтем дә юк.

- Уңышлар Сезгә, Җәвит абый!
- Рәхмәт!