Виталий Агапов авылдашларына бүләк ясый - чиркәү сала

Татарстанның халык артисты Виталий Агаповны күпләр киң күңелле, ярдәмчел шәхес буларак белә. Күптән түгел ул изге эшкә алынды - туган авылында чиркәү салдыра башлады.

- Туган авылым Сәвәләйгә, авылдашларыма, үземә 60 яшемә бүләк ясарга булдым. Халык белән бергәләп иман йорты - чиркәү салып ятабыз. Төзелеш эшләре 3,5 миллион сумга төшә. Әлбәттә, чыгымнарның күп өлешен үзем каплыйм. Авылдашларымның мин башлаган эшне хуплап, ил белән күтәреп алуларына мин бик шат. Ил төкерсә, күп була, ди халык. Менә бу - шул әйтемнең чын мисалы, - дип сөйләде безгә Виталий Агапов.