XXI гасыр тавышы – нинди ул?

«Калеб»нең җитәкчесе, Г.Кариев театры директоры Гүзәл Сәгыйтова әйтүенчә, мондый форматтагы аудиокитап чыгару идеясе оешмада күптән барлыкка килгән инде. Әмма төрле сәбәпләр аркасында, ул һаман кичектерелгән. Быел максат чынга ашты, аудиокитап чыкты: шигырьләрне авторлар үзләренең тавышы белән яздыра, тамашачы алдында да алар үзләре чыгыш ясый. Проза әсәрләрен исә актерлар яздырган: диктор ролендә – Камал театры артисты Эмиль Талипов.

Яшь тамашачы театры бинасында үткәрелгән чарада яшь шагыйрьләр катнашты дип әйтү дөрес тә булмас кебек. Әйе, алар яшь, әмма аларның иҗаты татар шигърияте белән кызыксынучы аудиториягә һичшиксез таныш. Сәхнәгә чыккан кызлар һәм егетләрне инде урта буын шагыйрь­ләр дип әйтергә дә вакыт җиткәндер. Гомумән, проектны эшләгән команда көчле составтан тора: Йолдыз Миңнуллина, Лилия Гыйбадуллина – редакторлар, Миләүшә Хәйруллина, Ләйсән Абдуллина, Эльмир Низамов – композиторлар. Авторлар командасы шулай ук бик көчле: Гөлүсә Баттал, Эльмира Җәлилова, Резеда Гобәева, Ленар Шәех, Рифат Сәлах, Булат Ибраһим һәм тагын бик күп талантлы каләм осталары.

Аудиокитапны төзүче, аны тәкъдим итү уңаеннан уздырылган әдәби-музыкаль чараның режиссеры, актриса Нәфисә Исмәгыйлева: «Ике ел элек «Сәрләүхәсез» спектаклен куйгач, Гүзәл Рәмзилевна мине «Калеб»кә эшкә чакырды, – дип сөйләде. – Шул елдан бирле бергә кайныйбыз. Аудиокитап чыккач, аны халыкка тәкъдим итү идеясе туды, Йолдыз да (Миңнуллина. – Ә.З.) хуплады. Без аны бергә эшләдек. Миләүшә Хәйруллинага да рәхмәтләрем чиксез, бер-беребезне гел аңладык. Алар белән күптән таныш инде мин, ә менә яшь шагыйрьләр белән проект өстендә эшләгәндә таныштык. Нәрсә шатландыра: татар әдәбиятының киләчәге өметле. Аларда фикер тирәнлеге бар. 30 авторның күбесе: «Чыгыш ясый белмибез», – дисәләр дә, үзләре чын профессиональләрчә чыгыш ясадылар, мин алар белән бик горурланам».

«Галәм – чиксез-чиксез бөтен җиһан.
Чиксезлекнең чиге бар микән?»
Чиксезлекнең чиге... Чиксезлекнең чиген күрмәдем. Ә бүгенге шигъ­риятнең, бүгенге әдәбиятның чиксез киләчәген күрдем. Чиксезлеген күрдем. Болай булса, югалмабыз!

«Калеб» тарафыннан уздырылган шушы чараның бүтән күрсәтелмәве ихтимал. Кызганыч, чөнки аны һәр татар кешесе, һәр татар егете һәм кызы карарга тиеш. Шуңа да бу турыда ишетәсез икән, аны һичшиксез барып карарга кирәк.

Әдилә Закирова