Ял бәяләре артмый дисәләр дә арта

Турпакетның уртача бәясе, узган сезон белән чагыштырганда, кимүгә таба бара. Аның бәясе Краснодар крае курортында ун көн ял иткән өчен бер кешегә 24 мең сум тәшкил итә, дип белдергәннәр агентлыкка «Интурист» матбугат хезмәтендә.

Сочида кунакханәгә урнашу бәясе нигездә узган елгы дәрәҗәдә калган. Кунакханәдә урнашу һәм юл бәясе дә кергән атналык пакетның уртача бәясе бер кешегә 22 мең сум тәшкил итә, дигән «Библио-глобус» туроператоры генераль директоры Ирина Костенко.
TUI туроператоры бәяләрне узган елдагы җәйге сезон дәрәҗәсендә сакларга ниятли.

Айдар Бакиров, “Пирамида тур” туристлык фирмасы учредителе:
– Бәяләрнең артмаячагына шикләнәм. Футбол буенча чемпионат уза торган шәһәрнең кыйммәтләнүе гадәти хәл. Казанда да бит отель-кунакханәләрдә урын калмаган. Фатир хуҗалары үзләренең аппартаментларын арендага бирергә җыена. Өч бүлмәле фатирны тәүлегенә 300 мең сумга бирәләр. Бер бездә генә түгел, уеннар узачак бөтен шәһәргә кагыла бу. Яңа елга кадәр юллама алучылар отты. Ни өчен дигәндә, бәяләр көн дә диярлек үсеп тора. Бу ике көндә доллар һәм евроның артуы юлламалар бәясенә бик зур йогынты ясады. Путевка алырга теләүчеләр аптырашта калды. Халык чит илгә барырга кызыга. Безгә мөрәҗәгать итүчеләрнең 99 проценты чит илгә юллама ала. Сатулар буенча беренче урында Төркия, аннары Тунис, Греция, Испания тора. Гарәп әмирлекләренә күп баралар. Үзебезнең курортларга килгәндә, хезмәт күрсәтү буенча чит илләрдән алар әле дә калыша. Инфраструктураны заманчалаштыру гына түгел, хезмәткәрләрнең мөгаләмәләрен дә шактый үзгәртәсе бар. Чит илдә бит сине күптән көтелгән кунак итеп кабул итәләр. Сиңа гел елмаеп, ярарга тырышып кына торалар. Бездә әлегә бу юк.