Ялга барганда чемоданны ничек дөрес итеп тутырырга?

Иң элек нәрсәләр аласыгызны язып куегыз. Аларның барысын да караватка чыгарып салыгыз. Болай иткәндә, берсе дә онытылып калмый. Хәзер инде, пирамида принцибына таянып, чемоданны тутыра башлыйбыз. Аның төбенә чалбарны салабыз. Чалбарның өске өлеше чемодан эчендә кала, балаклары өстә, аны чемодан кырыена салындырып куясы була.

Футболка, майка, блузка, рубашкаларны рулет итеп төреп, бер-бер артлы чалбар өстенә куеп барабыз. Ветровка яки толстовканы урталай бөкләп куябыз. Аның өстенә итәк, шорты, күлмәкләрне урнаштырабыз һәм чалбар балагын кайтарып куябыз. Эчке киемнәрне бер пакетка салып, чемоданның буш урынына тыгабыз. Аяк киемнәренә бахила кидерәбез. Эченә носкиларны тутырабыз да чемодан кырыена куябыз.