Зинһар өчен, куян бүләк итмәгез

Бүләккә матур да, аны карап-тәрбияләп тә торырга кирәк бит. Шуны истә тотып, Казан шәһәре дәүләт ветеринария берләшмәсе белгечләре мондый бүләккә бик җитди карарга кирәклеген искә төшерә. Алар әйтүенчә, Яңа елга куян бүләк итү яхшы идея түгел. Гомумән, уңышсыз сюрприз ул.

–   Күп очракта кешеләр мондый “бүләк” белән нәрсә эшләргә кирәген дә, ничек тәрбияләргә икәнлеген дә белми. Куянга исә бу зур стресс. Ул авырырга, хәтта үлеп китәргә мөмкин. Зинһар өчен, куян бүләк итмәгез. Үзе сатып алырга теләгән кеше бу хакта башта яхшылап уйлый, үзенең мөмкинлекләрен үлчәп кенә билгеле бер карарга килә. куян – уенчык түгел, аңа игътибар һәм тәрбия кирәк, – дип киңәш бирә белгечләр ведомствоның телеграм-каналында. 

Бактың исә, бер куянга фатирда кимендә 2 квадрат метр кирәк икән. Аның “өен” атнасына берничә тапкыр чистартасы, ризыкларын көн дә яңартып торасы була. Ике айга бер тапкыр, тырнакларын кисәр өчен, ветеринарга алып барасы икән. Елга бер мәртәбә прививка ясатасы. Алар көчле тавышны, кискен хәрәкәтләрне, шаулы уеннарны күтәрә алмый.

Әле шунысы да бар. Мошенниклар, декоратив куян дигән булып, гап-гади токымлы куян сатарга мөмкиннәр. Ә ул 6-8 килограммга кадәр үсә. 
Менә шул: үзегезгә дә, башкаларга да колаклы сюрприз ясап азапланмагыз. Алай гына да түгел: бүләгегез өчен ел буе каһәрли күрмәсеннәр.

Фото: http://pxhere.com