Зәмирә Рәҗәпова: «Тормышымда гомер онытылмаслык гайбәт булды!»

Хәзер бигрәк тә уңайлы бит – яраткан артистыңның социаль челтәрендәге битенә кереп «дуслашып» аласың да, тормышындагы бөтен вакыйгаларны вагы-төяге белән белеп, хәбәрдар булып торасың. Әле уйлаганыңны язып, үз фикереңне белдереп куярга да мөмкинлек бар. Кайвакыт танылган кешеләрнең фотолары астында, чын мәгънәсендә, салкын сугыш башлана, чөнки фикерләр төрле, каннар кайнар – виртуаль дөньяда гына булса да, үз сүзеңне өстен калдырасы килә бит... Кыскасы, тормыш кайный, чәйнәүчеләр чәйни, артистлар азыкны биреп тора – барысына да күңелле! Берәр җырчыны икенчесе белән «гүләйт иттереп», хатыныннан яки иреннән «аеру» өчен, гадәттә, дусларча кочаклашып, йә бергә басып төшкән бер фото җитә!

Гайбәтләр күп, тик барыбер арадан бер-икесе, сәерлеге беләнме, мәгънәсезлеге беләнме, аеруча истә калганы була. Бу темага сорауны, хәзерге вакытта популяр булган артистларга биргәч, үзем өчен кызык кына бер күзәтү ясадым: хатын-кызлар үзләре турындагы гайбәтләрне уйлап та тормыйча искә дә төшерәләр, тәмләп, җентекләп сөйләп тә бирәләр. Ә ир-егетләр өчен бу шактый авыр сорау булды – кайсысы бөтенләй искә төшерә алмый, кайсысы «минем турында нинди гайбәт булсын инде?» дип чын күңелдән аптырап куя. Булмас ди... Белмисез генә...

Зәмирә Рәҗәпова (алып баручы, тамада): «Ооо, гомер онытылмаслык бер гайбәт булды минем тормышымда! җиде ел тирәсе элек (Айдар абый Фәйзрахманов белән «Җырлыйк әле» тапшыруын алып бара торган чорлар иде) Балтач районы Балыклы авылында Сабан туе бәйрәмен уздырып ятам. Яныма бер апа килде, исәнләштек, минем иҗатымны күзәтеп бара, ошата икән, фотога да төштек, Себер якларыннан Сабан туена кунакка кайтканнар икән. Шулай бераз аралашып алгач, кыенсынып кына сорау бирә бу миңа: «Сеңелем, безнең Себер якларында синең турында бер сүз йөри, әйтергә дә уңайсызланам инде, сине Айдар Фәйзрахманов белән йөри дип әйтәләр, Айдар синең аркада гаиләсеннән киткән ди, хатыны бик елый икән, кызганабыз үзен... Сиңа алай йөрү килешми инде, кызым...» – ди! Еларга да, көләргә дә белмәдем! Әле шулвакыт янымда ирем дә басып тора, ярый ул андый гына гайбәтләрне аңлый торган кеше. Ә бу чыннан да сүз булып Айдар абыйның гаиләсенә ишетелсә? Айдар абый гаять итагатьле, тактлы кеше, студиядәге баскычлардан төшкәндә дә кул биреп төшерә, бәлки шуларны ниндидер аерым игътибар билгеләре дип кабул иткәннәрдер. Себер якларыннан килгән уенчылар катнашты бит тапшыруда...»

Альбина Бәширова

Фото: vk.com