3 чакрым җәяү йөрүче балага блогер велосипед бүләк иткән

Көек авылында яшәүче Фәррүх исемле малай Богородское авылындагы мәктәпкә йөреп укый. Бу араны ул җәяү 1 сәгать уза. 3 көн элек юлда баручы Фәррүхны блогер Люция Алеева күреп ала һәм машинасына утыртып мәктәпкә кадәр илтә.

Бу хәлдән соң, Люция Инстаграмдагы дуслары ярдәме белән малайга велосипед бүләк итә.  

"Фәррүхнең тарихын ишеткәч күңелем тулды. Баксаң, малай көн саен – эсседә, салкында, яңгырда һәм карда шушы юлсыз юлдан йөри икән. Ул бер сәгать бара һәм бер сәгать кайта. Минем бик тә бу мөстәкыйль геройга ярдәм итәсем килде. Инстадусларыма кирәк булмаган велосипед сорап мөрәҗәгать иттем. Ә алар 50-100 сум – кем күпме булдыра ала, шулкадәр акча җыярга тәкъдим итте. Бер көн эчендә кирәкле сумма җыелды. Бер көндә хыял тормышка ашты! Могҗиза түгелме бу? Фәррүхның куллары шатлыктан калтырады, ә минем йөрәк менә чыгып китәр төсле иде. Без аңа хыялындагы велосипедны бүләк итә алдык! Дөньяда мәрхәмәтле кешеләр күп. Бер-береңә ярдәм итәргә кирәк!” - дип язган Люция Инстаграм сәхифәсендә.