Рөстәм Садыйков: «Ярдәм күрсәтергә ашыккан җирдә сезнең дә якыннарыгыз булырга мөмкин бит»
Күптән түгел ЮХИДИ хезмәткәрләре Казан юлларында "Ашыгыч ярдәмгә юл бир" акциясен үткәрде. Бу чара машина йөртүчеләрнең "Ашыгыч ярдәм" хезмәтенә игътибарын арттыру максатыннан оештырылган.
Күптән түгел ЮХИДИ хезмәткәрләре Казан юлларында "Ашыгыч ярдәмгә юл бир" акциясен үткәрде. Бу чара машина йөртүчеләрнең "Ашыгыч ярдәм" хезмәтенә игътибарын арттыру максатыннан оештырылган.
Рейд барышында утларын яндырып, тавыш белән килгән "Ашыгыч ярдәм" машинасын күрмәдек дип акланучылар да, мин ашыга идем, дип җавап кайтаручылар да булган. Шулай да берничә ел элек "Ашыгыч ярдәм" машинасы хезмәткәрләре хәтта юлга чыгып үткәреп җибәрүләрен сорап йөрсә, бүгенге көндә тәрбияле шоферлар күбрәк, ди рейдны оештыручылар.
Рөстәм Садыйков, "Ашыгыч ярдәм" машинасында инде алтынчы елын эшли. Ул да бүген хәлнең уңай якка үзгәрүен искәртте:
- Хәзер юлларда безне аңлаучы кешеләр күбәйде. Төрле вакытлар була билгеле, кайвакыт юл бирмәүчеләр дә очрый. Юл хәрәкәтендә катнашучыларга шуны әйтәсем килә: без ярдәм күрсәтергә ашыккан җирдә сезнең дә якыннарыгыз булырга мөмкин.
Казан буенча ЮХИДИ җитәкчесе урынбасары Наил Габидуллин белдерүенчә, рейд вакытында машина йөртүчеләргә штрафлар күләме турында мәгълүмат бирелгән, тәрбия эшләре уздырылган. Әйтик, аларга кыска вакытлык фильмнар күрсәтелгән. Машина йөртүчеләр ул фильмны карагач, уйлга калды диделәр. ЮХИДИ хезмәткәрләре җиде юл кагыйдәләрен бозучыны туктаткан. Шуларның берсе видеоролик караудан баш тарткан, аңа карата протокол төзегәннәр. Сүз уңаеннан, хокук бозучыларга административ штраф - 500 сум, яки 1-3 айга машина йөртү таныклыгыннан мөхрүм итү каралган.
Комментарийлар