Ашыгыч ярдәм тизрәк йөри башлаячак

«Ашыгыч ярдәм» хезмәте яңача эшли башлый икән дип ишеттек. Бу яңалыкка ачыклык кертсәгез иде?
Сабина Вафина, Казан.

Татарстанның Сәламәтлек саклау министрлыгыннан алынган мәгълүматлар буенча, ашыгыч ярдәм хезмәтенең эшчәнлеген яхшырту максатларында, чынлап та кайбер үзгәрешләр кергән. Элек ашыгыч ярдәм хезмәтен чакырткач, башта махсус карта тутырылган, авыруны теркәп вакыт уза торган булган. Хәзер бригада, шалтырату килүгә үк, авыру янына ашыгачак. Ә пациент турындагы мәгълүматны диспетчер медицина хезмәткәрләренең һәрчак үзләре белән йөртә торган махсус планшетына хәбәр итеп юллаячак. Әлеге планшет ярдәмендә теге яки бу бригаданың кайсы адрес буенча тукталганнарын да чамаларга була. Бу авыр хәлдә калган пациентка тиз арада беренчел ярдәм күрсәтергә мөмкинлек бирәчәк.

^{_{Фото: prokazan.ru}}