«Автомобиль спортында уңыш 50 % – машинадан, 50 % кешедән тора»

Татарстан пилотлары бу юлы да сынатмады: быел «КАМАЗ-мастер» экипажы - «Дакар» раллисында кабат җиңүче пьедесталында. Шул ук вакытта Африкада барган «Африка­ЭкоРейс» ярышларында да безнекеләр алдынгы булды.

- Бу ике ярыш та бик җитди иде, командадан күп көч таләп итте. Берәүнең дә җиңүне җиңел генә бирәсе килми. Беренче урынга 15 экипаж дәгъва кылды. Һәр минут, һәр метр өчен ярыштык. Көндәшләребез белән аерма нибары 2,5 минут кына иде, - диде «КАМАЗ-мастер» командасы җитәкчесе Владимир Чагин.

«Дакар - 2017» раллисы җиңүчесе Эдуард Николаев җиңүнең чын мәгънәсендә яулап алынганлыгына тукталды.

- Аеруча һава торышы сынады. Оештыручылар корылык вәгъдә иткән иде, ләкин берничә көн тоташ яңгыр яуды. Шуның аркасында махсус әзерләнгән мәйданчыклардан баш тартырга туры килде. Йөк машиналарына икеләтә авыр булды. «Камаз»лар җир астына төшеп кенә китте. Аларны трактор, эскалатор белән чыгарырга туры килде. Сак йөрергә тырышсак та, без дә чокырларга эләктек, ләкин көндәшләребезгә караганда тизрәк чыктык. Әллә ничә тапкыр көпчәкләр тишелде. Көньяк Америкада тимерчыбык кебек үлән үсә, көпчәкне менә шул ертып-ертып ала. Ничек тә туктамаска тырыштык. Көпчәк алыштыру да 8-12 минут вакытны ала бит, - диде Эдуард Николаев.

«Дакар» раллисында быел беренче тапкыр ­Россия командасы багги классында (җиңел машиналар ярышы) җиңү яулады. Равил Маганов белән Кирилл Шубин, раллида тәүге тапкыр катнашып, өченче урын алды. Хәзер егетләр «Ефәк юл» ярыш­ларына әзерләнә.

Спортчылар сүзләренчә, җиңү өчен машина гына түгел, ә кеше дә физик яктан әзерлекле булырга тиеш. Таулы җирдә узышканда аеруча.
- Тауларда ун метр җә­яү барсаң да авыр: игътибар кими, баш авырта, күңел болгана. Автомобиль спортында уңыш 50 процент - машинадан, 50 процент кешедән тора. Кайвакыт тыштан көчле булып күренгән ир 50-100 чакрымнан соң коелып төшә, - диде күпне күргән Владимир Чагин.
«Дакар» раллисында техник регламент һәрвакыт үзгәреп тора. Бу, әлбәттә, ­«КАМАЗ» өчен файдага түгел. Мәсәлән, 2018 елда булачак ярышларда двигательнең ягулык сыйдырышлыгы 13 литрдан артмаска тиеш, ә «КАМАЗ»ныкы - 16,2 литр.

- Хәзерге вакытта двигательне үзгәртү буенча эш алып барыла, ләкин киләсе елга катнашу-катнашмау мәсьәләсе ачык кала, - диде Владимир Чагин.

2011 елда спорттан киткән тере легенда рульне яшьләргә тапшырганнан соң булган кичерешләре белән дә уртаклашты.

- Спорттан киткәч, рульгә бүтән утырмадым. Күбрәк янәшә утырып йөреп, яшь­ләргә киңәшләр бирдем. Хәзер аларның җиңүләренә үземнекенә караганда да ныграк сөенәм. Без Татарстаннан булуыбыз белән горурланабыз. Элек чит илләрдә «КАМАЗ» сүзен дә көчкә әйтәләр иде, хәзер «КАМАЗ»ны да, Татарстанны да беләләр, - диде Владимир Чагин.