Бушка ашатсалар да, акча сорыйлар

Казанда вакыт белән түләнә торган кафе ачылган. Әйтүләренчә, әлеге яңа бизнес-идеяне мәскәүле Иван Митин тәкъдим иткән.
Кафеда ризык өчен түләргә кирәкми, ә менә анда үткәргән вакыт өчен кесәңнән акчаны чыгарып бирергә туры киләчәк, ди. Анда килеп керүгә, сезгә сәгать бирелә, аннары тактага акбур белән исемегез һәм килү вакытыгыз языла. Йомшак кәнәфигә йә булмаса таган яки гамакка утырып, баллы тәм-томнар белән чәй, каһвә эчә аласыз. Ризыкны үзең белән дә алып килергә була. Ә инде кафедан чыгып киткәндә монда уздырган вакыт өчен акчаңны түләп калдырасың. Бер минут бер сум белән исәпләнүен дә әйтергә кирәк.
«Максатыбыз бушка килгәнне яратучыларны тукландыру түгел, ә монда килүчеләрне төрле түләүләрдән, чәйгә куелган кыйммәт бәяләр һәм официантка түләүләрдән азат итү. Кешеләрне социаль челтәрләрдән «тартып чыгарып», виртуаль аралашуны чынбарлыкка алыштырасыбыз килә», - ди кафены оештыручы Иван Митин.
Кафе чормада урнашкан, монда көчле музыка да, исерткеч эчемлекләр дә юк. Тиздән компьютер белән интернет та булдырылачак ди.