«Егетләр мәзәкләрне яхшырак яза, ләкин кызлар аны сәхнәдә остарак уйный – чөнки аларда харизма бар»

29 март көнне Татарстанның Халыклар дуслыгы йортында көлке «дозасын» күпме телисең, шуның кадәр кабул итәргә була иде. Көлдерүчеләре - әле бу өлкәдә канат кына чыгып килүче мәктәп укучылары. Шаяннар һәм тапкырлар клубындагылар фикеренчә, балалар юморы аеруча үзенчәлекле. «Яшел Үзәк», «Фәрит абый», «Авиарежим», «КҖК», «ББК», «Оекбаш», «Теге ни», «Оба-на» (Чаллы) дигән сигез команда көндәлек актуаль проблемалардан рәхәтләнеп көлде. Балалар юморы мәктәп темасы кысаларыннан чыкмас дигән идем, алар «Инстаграм»да бара торган «туры эфир», татар эстрадасы, беренче мәхәббәт, аталар һәм балалар темаларын, хәтта татар теле үзенчәлекләрен дә юмор аша күрсәтә алды.

- Казанда мәктәп укучылары арасында ШТК уеннарын инде җиденче тапкыр оештырабыз. Безнең балалар бары тик татарча гына көлдерә, бу үзенчә - яшьләрдә туган телгә, милләтебезгә карата мәхәббәт уяту. Балалар белән ел әйләнәсендә кураторлар эшли. Алар укучыларга кызыклы номер куярга ярдәм итә. Быел безнең иң яшь сезон. ШТКчылар - 7-8нче сыйныф укучылары, - диде мәктәп укучылары арасында ШТК уеннарын оештыручы Гаяз Гыйльманов.

Никтер, кызларда юмор хисе юк, дигән фикер йөри. Ләкин бүгенге ШТК уенында, егетләргә караганда, үткен телле, зирәк фикерле кызлар күбрәк иде. Шуларның берсе - Авиатөзелеш районының 14нче гимназия укучысы Лиана Зәйнуллина. Ул менә өченче ел инде «Яшел Үзәк» командасында чыгыш ясый. Шуңа өстәп, вокал буенча төрле конкурсларда катнаша.

- Берсүзсез, егетләр мәзәкләрне яхшырак яза, ләкин кызлар аны сәхнәдә остарак күрсәтә. Һәр хатын-кыз актриса, дип тикмәгә генә әйтмиләр бит инде. Кызларда харизма бар. ШТК безнең өчен күп мөмкинлекләр ача. Әйтик, сәхнәдә үз-үзеңне тотарга өйрәнәсең, кешеләр белән дөрес итеп аралашасың, - ди Лиана.