Ел башыннан исерек килеш машина йөртүче 29 кешенең юл һәлакәтендә гомере өзелгән

Әле күптән түгел генә Чаллыда 34 яшьлек бер исерек машина йөртүче җәяүлеләрне бәрдергән иде. Азнакайда да берәү зур тизлек белән хәрәкәт итеп, каршы як полосага чыгып, юл читенә очкан.

ЮХИДИ хезмәткәрләре бу проблема белән кулларыннан килгәнчә көрәшә: рейдлар уздыра, кисәтү эшләре алып бара. Быелның җиде аенда ЮХИДИ хезмәткәләре тырышлыгы белән спиртлы эчемлек кулланган килеш машина йөрткән кешеләрне тоткарлау нәтиҗәсендә, 8 меңгә якын хокук бозу булдырылмый калган.
Билгеле булганча, исерек килеш машина йөрткән өчен 30 мең сум штраф каралган. Ике елга машина йөртү таныклыгын да алалар. Ә инде икенче тапкыр исерек килеш ЮХИДИ кулына эләккән кешене ике елга ирегеннән мәхрүм итәргә дә мөмкиннәр.

Юл иминлеге инспекторларын борчыган тагын бер проблема – машина тәрәзәсен каралтып йөрүчеләр. Ел башыннан бирле 28 мең мондый тәртип бозучы административ җаваплылыкка тартылган. ЮХИДИ хезмәткәрләре каралтылган тәрәзәле машиналарны гел барлап торырга тырыша. Аларны ачыклау буенча даими рейдлар да үткәрелә. Тәҗрибә күрсәткәнчә, норматив буенча каралтылмаган тәрәзәләр машина йөртүченең бигрәк тә кич, эңгер-меңгер вакытында уяулыгын киметә, юл һәлакәтләренә дә сәбәпче булырга мөмкин. Канун нигезендә алгы, ян яктагы тәрәзәләрнең яктылыкны үткәрү дәрәҗәсе 70 процентны тәшкил итәргә тиеш. Әгәр бу таләп үтәлми икән Административ хокук бозулар турында Россия кодексының 12.5нче маддәсе буенча (3.1 бүлек) 500 сум штраф каралган.

Юл инспекторлары беренче тапкыр туктатканда машина йөртүче белән аңлату, кисәтү эшләре алып бара. Әгәр инде бу кеше икенче тапкыр да шул сәбәп аркасында тоткарлана икән, ул полиция хезмәткәрен тыңламаган булып исәпләнә. Андый очракта әлеге кодексның 19.3нче маддәсе буенча аңа 1000 сумга кадәр штраф салырга мөмкиннәр. Яки 15 тәүлеккә кадәр административ арест салулары да бар. Быел барлыгы 40 машина йөртүче җәзага тартылган.