Гарифҗан Мөхәммәтшин: «Мөрәҗәгатьтә берничә урында «этнос» дигән сүз дә кулланылды – этнос түгел, милләт буларак сакланып каласы иде»

Гарифҗан Мөхәммәтшин, шагыйрь, публицист:

- Президент тел мәсьәләсендә өстән генә, бик сак кына кагылып үтте кебек. Бу күпмедер борчуга сала. Мөрәҗәгатьтә берничә урында "этнос" дигән сүз дә кулланылды. Этнос түгел, милләт буларак сакланып каласы иде. Телне өйрүәүне гел методикага гына сылтыйбыз. Беренчедән, туган телне өйрәнү кануннар белән ныгытылырга тиеш булса, икенчедән, ул җәмгыятькә кирәк булырга тиеш. Әле татар телен укытмыйбыз дигән карар кабул ителмәгән, ә үзебезнең татарлар ук моңа инде риза, хәтта эчке каршылык та юк, үзаң юк. Бу бик куркыныч. Әлбәттә ана телен, динне саклау, иң беренче чиратта, гаиләдә булырга тиеш, ләкин җәмгыятьтә ихтыяҗ юк икән, гаиләдә аңа көч сарыф итәселәре килми шул.
Ә гомумән алганда, чыгыш республиканың Россия күләмендәге абруен аңлап, шуңа нигезләнеп язылган. Бурычлар, чишеләсе мәсьәләләр бүгенгене генә түгел, киләчәкне күзаллап куела һәм кеше мәнфәгате кайгыртыла. Монысы бик сөендерә, күңелдә үзебезнең Татарстан өчен горурлык туа.