Җиңүчегә – автобус

Башкалабызда халык театрларының төбәкара «Идел-йорт» фестивале бара. Фестивальнең быелгысы драматург Кәрим Тинчуринның 125 еллыгына багышлап үткәрелә. Зоналарда үткән фестивальдә 400дән артык үзешчән артист катнашты. Икенче турда 43 театр үз сәләтен күрсәтсә, Казанга унбиш коллектив килде. Катнашучыларны Татарстанның һәм Россиянең халык артисты Әзһәр Шакиров җитәкчелегендәге жюри бәяли. Төрле төбәкләрдә йөздән артык спектакль күрсәтелгән. Фестивальгә 10 декабрьдә Г. Камал исемендәге Татар дәүләт академия театрында йомгак ясалачак һәм шул ук көнне Гран-прига ия булган коллектив үзенең спектаклен күрсәтәчәк. Җиңүче коллективка хөкүмәт тарафыннан быел да кечкенә автобус тапшырыла.