Илдар Гыйльметдинов: «Нишләп Президентның сүзләрен ишетмәделәр?»

Илдар Гыйльметдинов, Россия Дәүләт Думасының Милләтләр эше комитеты рәисе, Федераль татар милли-мәдәни автономиясе советы рәисе:

- Президентның рус һәм татар телләрен укыту турындагы фикеренә кушылам. Рөстәм Миңнеханов моның турында бүген генә әйтмәде, ике-өч ел элек үк рәсми рәвештә дә, рәсми булмаган формада да әйтеп килде. Нишләп Президентның сүзләрен ишетмәделәр? Тел мәсьәләсе дә безне генә түгел, аны да борчый. Укыту методикаларын чынлап та камилләштерергә кирәк. Башка юл юк. Һәм бу эшкә бүгеннән үк тотыну зарур. Югыйсә аны безнең өчен башкалар язып бирәчәк. Рус балаларына татар телен укытмадык түгел, укыттык. Нәтиҗәсе бармы соң? Юк. Рус баласы түгел, татар баласы да үз ана телен белми әле. Мине беренче чиратта шушы нәрсә борчый. Йоклап утырмыйк, үзгәртик татар телен укыту программасын. Катлаулы методика белән татар телен өйрәнүдән биздермик балаларны. Куркытмыйк татар теле дәресләре белән. Укысыннар - бетте-китте дигән принцип белән барып булмый бүген.