Казахстанның Генераль консулы кайсы ризыкны пешерергә ярата?

- Казахстанның Генераль консуллыгы Казандагы башлангычларны иң актив хуплаучыларның берсе. Моңа ике халыкның туганлык җепләре, милли-мәдәни уртаклык та уңай йогынты ясый, әлбәттә. Казанда күп милләтләр вәкилләре яши яки белем ала. Татарстан җитәкчелеге республикада халыкларның дуслыгына зур әһәмият бирә, - диде Дарья Санникова.

Казанның туристлыкны үстерүгә теләктәшлек комитеты һәм “DALI” аш-су театры хуҗалары Римма белән Рамил Гариповлар милли ризыклар әзерләү осталык-сыйныфы сериясен башлап җибәрде. Тәүге дәресне Казахстанның Казандагы Генераль консулы Ерлан Узанович Искаков үткәрде. Ул, ризык пешерү- хатын-кыз эше, дип санамый. Үзе рәхәтләнеп ашарга әзерли, казахның милли ризыкларыннан бишбармакны пешерергә ярата икән.

- Казах белән татар халкы борынгыдан дус булып, аралашып яшәгән. Бу дуслык һәм хезмәттәшлек саклансын. Казах халкының милли ризыклары татарстанлыларга хуш булсын! Казах, татар, башкорт һәм нугайларның аш-сулары бик охшаш бит, - диде Ерлан Искаков.

Ерлан әфәнде казахларның бәйрәм ризыгы-бишбармак пешереп күрсәтте. Ул ит һәм камыр кисәкләреннән гыйбарәт. Табактан кул белән алып ашау гадәтенә бәйле рәвешле “бишбармак” дип аталган. 

- Кодалар, туганнар җыелышканда яки мәҗелестә ризыкны башлап өлкән кеше бүлә. Табын үзенә бер тәрбия мәктәбе, - ди Генераль консул.

Казахстанның төньяк төбәкләрендә, Ерлан Искаков сөйләгәнчә, майлы итләрне һәм майлы ризыкларны кулланалар икән. “Себер салкыннары анда кышларын, шунлыктан, кешеләр майлы ризык ашый”, - дип аңлатты ул.

Татарларның чәй ризыклары баллы, ә казахларның камыр һәм эремчек-сыр ашамлыклары бик тозлы икән. Майда йөзеп йөргән бишбармак белән сыйланганнан соң, чәйне дә тоз белән эчәсең шул.