Казан фаҗигасы кабатланды: гаеплеләр җавап тотар, тик яшьли өзелгән гомерләрне кире кайтарып булмас

4 декабрь көнне кич белән Төмән - Ханты-Манси федераль трассасының 926 нчы чакрымында балаларны спорт акробатикасы буенча бәйгегә алып барган автобус юл һәлакәтенә юлыккан.

Автобус салонында 34 кеше булган, аларның 27се - балигъ булмаган балалар, дип хәбәр итә «Российская газета». Фаҗигадә 12 кеше һәлак булган: 10ысы - балалар, икесе - акробатика буенча үсмерләр төркеменең тренерлары. Калганнарын төрле тән җәрәхәтләре белән Ханты-Манси автоном округының хастаханәсенә озатканнар.

Нефтеюганск шәһә­реннән бәйгегә килгән яшь спортчылар «Олимпийская» кунакханәсендә яшәгәннәр. Аларны анда күргән кешеләр: «Барысы да шат күңелле, уйныйлар, көләләр, йөгерәләр, бииләр, фотоларга төшәләр, бер кызның туган көнен дә билгеләп уздылар», - дип искә алалар. Спорт акробатикасы буенча бәйгедә балалар икенче урын яулаган. Һава торышы тотрыксыз, явым-төшем булуга карамастан, автобус балалар белән кайтыр юлга чыга. Тикшерү нәтиҗәләре буенча, автобус шоферы һава шартларын исәпкә алмыйча, тизлеген арттырган, аннары идарәне югалтып, ике җиңел автомобиль һәм йөк машинасы белән бәрелешкән. Хәзер әлеге һәлакәт буенча тикшерү эше бара. Вакыйганы Россия Гадәттән тыш хәлләр, сәламәтлек сак­лау министрлыклары, ил җитәкчелеге үз күзәтүенә алган.

һәлак булган балалар укыган Нефтеюганск шәһәрендәге мәктәпләрдә матәм көннәре узган. Шулай ук юлларда сак булу, куркынычсыз йөрү дәресләре дә үткәрелгән. Кызганыч, сак булыр­га кирәклеге турында бәла-каза булганнан соң гына искә төшә шул. Моннан бер ел элек Казанда да шушы фаҗигагә охшаш хәл булган иде. Казаннан Санкт-Петербургка спортчы балаларны каратэ буенча бәйгегә алып барган автобус, йөк машинасы белән бәрелешеп, юл һәлакәтенә очраган иде. Ул чакта фаҗигадә өч кешенең гомере өзелде. Икесе - балалар. Мондый вакыйгалар сабак булсын иде. Юлларда сак булыйк.

Төмән-Ханты-Манси трассасында һәлак булган балаларның 9ын бүген, 7 декабрьдә, Нефтеюганскида җирләделәр, ә бер кызны әти-әниләре соравы буенча, Ташкентта соңгы юлга озаталар.