Казан фатирында асралучы Серый атлы әтәчкә “хатын” кирәк

– Барысы да улымның хыялыннан башланды. Ул дүрт яшеннән йомыркадан чеби чыкканны күрергә тели иде. Шуннан тәвәкәлләдек тә, интернеттан карап, йорт инкубаторы ясадык. Авылдан йомырка алып килдек. Тик аларның күбесеннән чеби чыкмады, – дип сөйли Альбина.

Ул балалар бакчасында эшли. Шул чакта аның эшенә мини-зоопарк тамаша күрсәтергә килгән булган, бу хәлләрне ишеткәч, зоопарк хуҗасы Альбинага аурукан токымлы кошның зәңгәр йомыркаларын бүләк иткән. Кыскасы, гаилә тагын бер тапкыр тәҗрибә уздырырга булган. Бу юлы инкубаторны кибеттән сатып алган. Ни хикмәт, ул арада үзләре әмәлләгән инкубатордагы теге авыл йомыркасының да берсе “борынлаган”. Ә кибетнекендәге зәңгәр йомыркадан әтәч чыккан.
– Кызганыч, сары йомыркадан чыккан тавык озак яши алмады. Дүрт ай дигәндә үлде. Ә менә әтәчебез яши. Серыйга тиздән бер яшь тула инде. Ул безгә бик якын. Улым белән кызымның дустына әйләнде ул. Шуңа да аны чалырга, кемгәдер бирергә дә теләмибез, – ди Альбина.

Серыйга төнгә катнаш азык бирәләр, ә көндез гаиләсе белән бергә ашый. Кешедән алда аш бүлмәсенә йөгереп керә икән. Иртә белән “кикрикүк” дип кычкыргач, кызы аны әрҗәдән чыгара. Аннары Серый аның белән бергә караватта ятып тора. Чисталыкны саклый әтәч, үзенең махсус әрҗәсе дә бар.
– Кызым кем беләндер телефоннан сөйләшсә дә, әтәчебез үзенчә канәгатьсезлек белдерә. Нидер сөйләнә, төрле тавышлар чыгара. Төчкерә дә белә. Томшыгы белән ишек ачарга да өйрәнде. Мин ишектән керүгә башмакларымны китереп бирә. Без аны шундый яратабыз, ансыз тормышны күз алдына да китермибез. Җитди авыруы булган кызым өчен дә юаныч ул Серый, – ди Альбина.

Алар берара фатирларында “Барма” токымлы тавыклар да тоткан. “Алар салган йомыркаларны пешереп тә ашадык. Кайберләрен эштәге кызларга сата идем. Акчасын улыма алып кайтып бирәм. Үзенә күрә бизнес булдырам дип тә хыялланып йөрде әле улым. Кемгә охшаган диген? Авылга да сирәк кайтабыз, ә ул кош-кортлар белән кызыксына. Җәй көне үпкәм ялкынсынып авырып алдым. Тавыкларны ышанычлы бер абзыйга бирергә туры килде”, – ди әңгәмәдәшем.
Улларының әтәчнең үз чебиләрен тәрбияләп үстергәнен бик тә күрәсе килә икән. Шуңа да яңа хыял белән янып йөри. Серыйга бер тавык – “хатын” алырга кирәк, ди.