Казан транспорты кем тавышы белән сөйли?

Аларның тавышын Казан халкы һәм кунаклары көн дә ишетә. Бүген без шәһәр транспортында тукталышларны игълан итүче тавыш ияләре белән сезне дә таныштырабыз. Тукталышларны иң беренчеләрдән булып «Татарстан» радиосында эшләгән Николай Игнашов белән Фәйрүзә Мәсхүт игълан итә башлый. Аларның тавышы белән 2, 6, 11, 12 нче трамвай маршрутлары «сөйләшә». Ә соңрак аларны автобус тукталышларын игълан итәргә чакыралар.

- Автобус тукталышлары игълан итүне ниндидер зур дәрәҗә дип санамыйм, шулай да бу үзенә күрә бер тарих. Башта тавыш яздыру оешмасында исемнәрне игълан иттек. Ләкин язмаларның сыйфаты безне канәгатьләндермәде, шуңа да бөтен эшне үз өемдәге тавыш яздыру студиясендә башкардык. Монтажны да үзебез ясадык. Тавышны исә заказ бирүчеләр үзләре көйләде. Мин хәзер дә радиода диктор, «Азан» радиосында хәбәрләр сөйлим. 2018 елда була торган Футбол буенча дөнья чемпионатына әзерләнгән фильмны тавышландырам.

Универсиада алдыннан автобус тукталышларын яңадан яздыру сәбәпле, хәзер Фәйрүзә Мөслимова белән Николай Игнашовның тавышы яңгырамый. Фәйрүзә ханым тавышы исә метро тукталышларын игълан итә.

- Әле дә хәтерлим, безне дүртенче трамвай депосының юбилее уңаеннан тукталышлар игълан итәргә чакырганнар иде. Ул вакытта зур бәйрәм оештырылды. Бәйрәм хөрмәтенә Асаф Вәлиев «Трамвайчы кыз» җырын да әзерләгән иде. Шул көннән инде күпме гомер үтте, ә безнең тавышлар һаман да Казан урамнарында яңгырый. Автобус тукталышлары яздырганда, тукталыш исемнәрен татар теленә үзем тәрҗемә иттем. Ул вакытта күп эш башкарылды, тел белгечләренә мөрәҗәгать итәргә туры килде. Соңыннан тавышым метрога «төште». Ул вакытта мин әле кызым янында Америкада идем. Мине эзләгәннәрен белгәч, ризалыгымны бирдем. Метродагы тавыш яздыру башкалардан бераз аерылды. Монда без мөмкинлекләре чикле булганнарга да уңайлы булсын дип тырыштык. Мәсәлән, сукыр кеше буталмасын өчен тукталышлар игълан иткәндә бер якта - ир-ат тавышы, икенче якта хатын-кыз тавышы яңгырый. Элек диктор һөнәрен бик олылыйлар иде. Миңа әбиләр, кызым, синең тавышыңны тыңлап үстек без, ди. Мин исә: «Алайса, миңа инде 100 яшь була», - дип елмаям.

Рафаэль Миргаязов автобус белән трамвайларда тукталышларны рус һәм инглиз телләрендә игълан итә. Аның тавышын рек­лама, фильмнарда да ишетеп була.

- Тавыш яздыру студиясендә эшләүче танышым, әйдә, эшләп карыйк, дип мөрәҗәгать итте. Башта кастинг узар өчен өч телдә 5- 6 тукталыш яздырттылар. Ике айдан шалтыратып, инглиз һәм урыс телләрендә тавышың бара дип әйттеләр. Инглиз телен алай ук яхшы беләм дип әйтә алмыйм. Сөйләшү һәм аңлау дәрәҗәсендә инде. 2004-2006 елларда «Яңа гасыр» радиосында диктор булып эшләү тәҗрибәсе дә бар иде, шул ярдәм итте, күрәсең.

Татар телендә автобус тукталышларын игълан итә.

- Тавыш яздыру минем өчен гадәти күренеш, шуңа бу эш җиңел бирелде. Баштарак: «Автобуста синең тавыш яңгырый, ахрысы?» - дип сораучылар күп булды. Кемдер тавышымны танып: «Кайда ишеткән бар соң сине?» - дип сорап куя. Шәһәр транспортында тавышымны ишеткәч, кимчелекләремне эзли башлыйм, төзәтәсем килгәннәре дә бар. Кайвакыт тормыш иптәшем Рамил дә, бу сүзне дөрес әйтмәдең, дип кисәтү ясый. Тукталышлар исемен яздыру тыгыз вакытка туры килде, берөзлексез сигез сәгать эшләдек. Шуңа да җитешсезлекләр булгандыр инде. Тавыш яздырганда безнең шәһәрдә мин белмәгән шактый тукталыш исемнәре бар икәненә игътибар иттем. Әйтерсең мин башка шәһәр тукталышларын игълан итәм.

Ниязның тавышын Казан 2010 елда ишетә. Ул автобус­ларда һәм метрода тукталышларны инглиз телендә игълан итә. Нияз университетта ук инде инглиз телендә төрле чаралар, конференцияләр, чемпионатлар алып барган.

- Тукталышлар игълан итәргә мине танышым чакырды. Ул вакытта җәй бик кызу иде, шуңа да тавыш яздыру процессы тынчу, эссе вакыт белән истә калган. Универсиада алдыннан Казанны искә төшерсәгез, ул вакытта элмә такталар да, автобус тукталышлары да өч телгә күчеп бара иде. Тукталышларны инглиз теленә укытучылар составы белән тәрҗемә иттек. Бу бик авыр процесс, чөнки телне генә түгел, тарихны да белү мөһим. Тавышымны танымыйлар. Дөресен генә әйткәндә, кешеләр тукталышларда яңгыраган тавышка игътибар да итмиләрдер.