Казанда Европа музейлары белән тиңләшерлек заманча мультимедияле интерактив музей ачылды (ФОТОРЕПОРТАЖ)

Музей биш тематик залдан тора. Залның берсендә интерактив тач-панельләр ярдәмендә тарих битләрен актарасың. Аклы-каралы фотолар ярдәмендә татар халкының киемнәре, көнкүреше, архитектурасы, билгеле шәхесләрнең биографиясе белән танышып була. Икенче залда Иске Татар бистәсенең архитектор-реставраторлар ярдәмендә эшләнгән макеты куелган. Милли киемнәр кигән экскурсоводлар бистәнең тарихта гына калган һәм шулай ук бүгенге көндә дә сакланган биналары белән таныштыралар.

"Шәрык" клубы стилендәге залда исә инфографика фоматындагы видеотарихка кереп "чумасың". Биредә татар тарихы буенча викторина сорауларына да җавап бирергә тәкъдим итәләр. Ә менә чәй залы үзенә бер кызык. Татар өе формасындагы залда сине виртуаль татар әбисе каршы ала. Баллы татар тәм-томнары белән төрле үләннәрдән кайнатылган чәй эчкән арада ул сиңа татарлардагы чәй эчү культурасы, теге яки бу ризыкның ничек әзерләнүе турында сөйли. Татарларның чәй яратулары турында һәркемгә мәгълүм. Шуңа да кунакларга дигән чәй кырык литрлы самавырда кайнап тора. Хуш исле тәмле чәйне һәм тәм-томнарны сатып алу мөмкинлеге дә бар.

Музей 250 квадрат метрлы мәйданны алып тора.
Музей белән идарә итүче Регина Гарипова сүзләренчә, экскурсия бер сәгать дәвам итә. Мультимедияле музейның экспозициясе тулысынча авторлык контентыннан тора. Әлеге проектны гамәлгә ашыру өчен ел дәвамында бөтен Россия буенча югары класслы йөздән арытк профессионал эшләгән.
Музей ялларсыз сәгать иртәнге 9дан кичке 8гә кадәр эшли.