Казанга метеоритлар куркынычы янамас

«Казаннан 40 чакрым ераклыкта урнашкан Энгельгардт исемендәге астрономия обсерваториясенә теләсә нинди зурлыктагы метеоритларны гына түгел, хәтта галәм чүбен дә күрә алырлык үзенчәлекле «Мегатортор» приборы куелачак. Ул күк гөмбәзен өзлексез карап-тикшереп торачак», - дип белдерә обсерватория директоры Юрий Нефедьев. Бу 9 каналлы «метеоритлар аучысы»ннан эре метеорит түгел, хәтта шөреп кадәрле генә космик чүп тә качып кала алмый. Мондый приборлар дөньяда бар барын, әмма алар 1 каналлы гына булганлыктан, күкнең кечкенә генә өлешен колачлый ала икән. Казанда булачак 9 каналлы «аучы»ның исә бу яктан мөмкинлекләре чиксез. Аны Россия Фәннәр академиясенең махсус астрофизик обсерваториясе эшли. 32 миллион сумлык җиһазны сатып алырга акча Казан университетын үстерү программасы кысаларында бирелгән.