Колин Аллен: «Без һәр җирдә беренче чемпионат Казанда үтте дип сөйлиячәкбез»

Казан кызы Лилия Әскәрова да тумыштан ишетми. Тормышта үз һөнәрен табарга аңа кайчандыр әнисе ярдәм иткән. Ун ел элек кыз аның киңәше буенча сәнгать мәктәбендә чәчтараш һөнәрен үзләштерә. Бу һөнәре аңа даими керемнән тыш, тормышта югалып калмаска да ярдәм итә.

- Эшкә мин танышларым аша урнаштым. Минем кебек кешеләр барысы да шулай эшли, башкача булмый. Баштарак эшкә кереп китү читен иде. Миңа бит клиент белән аралашырга, аның фикерен тыңларга кирәк. Кешенең ни әйтергә теләгәнен йә язып белә идем, йә иреннәре хәрәкәтеннән сүзләр төзи идем. Тора-бара даими клиентларым да барлыкка килде. Аларны мин инде сүзсез аңлыйм. Хәзерге вакытта мин дикрет ялында, - диде Лилия.

Казан төзелеш көллияте бинасында Мәскәү, Свердловск өлкәсе, Удмуртия, Татарстан белән Башкортстаннан килгән 50гә якын яшь белгеч үзен ун һөнәр буенча сынап карады. Чәчтараш һөнәреннән тыш биредә тагын лаборатор-химик анализ ясаучы, агач остасы, пешекче, фотограф, флорист, тимерче, моляр, кирпеч салучы, челтәрле һәм системалы идарә белгече кебек һөнәрләр дә бар иде. Оештыручылар сүзләренче, бу белгечлекләрнең исемлеге елдан-ел зураячак әле.

DeafSkills дөньяда тиңе булмаган беренче чемпионат ул. Татарстан Республикасының Президент ярдәмчесе Ләйлә Фазлыева сүзләренчә, аның Казанда узуы тагын да әһәмиятле.

- Татарстан өчен бу бик мөһим чара. "Бер-береңне ишетергә өйрәнү" дигән сүз бар, нәкъ менә бүген без башкаларны ишетергә, тыңларга, аңларга өйрәнәбез. Бер-береңне ишетү өчен биредә никадәр зур һәм авыр эш башкарыла. Бу, бер яктан, яшь белгечләргә юл салу, икенче яктан, безне шундый шартларда эшләргә өйрәтү чарасы да, - диде Ләйлә Фазлыева.

Татарстанда 6 меңгә якын кеше начар ишетә яисә бөтенләй ишетми. Шуларның 32 проценты гына эшкә урнашкан. Ә дөньякүләмендә 25 процент ишетмәүче бөтенләй белем алудан да мәхрүм. Бу тигезсезлекне бетерү максатыннан DeafSkills мәйданчыгында ишетмәүчеләр өчен вакансияләр ярминкәсе оештырылды. Дистәләгән оешма, бу яшьләрне үз кулы астына алырга риза иде. Никита Хоркин да чемпионатта аш-су осталыгы буенча төп эксперт булуга карамастан, бер үк вакытта үз кулы астында эшләргә сәләтле белгечләр барлый иде.
-Ишетмәүче кеше, үз өлкәсендә сәләтле белгеч була ала. Андыйларның дөньяга карашы үзгә, фикерләре дә креатив була, - ди Никита.
Әйтергә кирәк, яшь белгечләргә бирелгән биремнәр WorldSkills стандартларына охшаш булса да, аннан бераз гына йомшаграк бәяләнә.

- Ишетмәүчеләр эшли алмый дип уйлыйсызмы? Ялгышасыз! Алар дөньяны үзгәртә ала. Бу ярышлар дөньякүләм мөһим чара. Без һәр җирдә беренче чемпионат Казанда үтте дип сөйлиячәкбез, сез тарихка кереп калдыгыз. Татарстан Президентына, республиканың Мәгариф һәм фән министрлыгына аны үткәрергә ярдәм иткәне өчен зур рәхмәтемне җиткерәм, - диде Бөтендөнья ишетмәүчеләр федерациясе президенты Колин Аллен.