Көрәкләрегезне әзерләп куегыз, карлы кыш килә

Быел кыш кыска булачак, дип хәбәр итте безгә Казан федераль университетының Метеорология, климатология һәм атмосфера экологиясе кафедрасы доценты Тимур Әүхәдиев. Белгеч моны февраль аеның климатик нормадан җылырак булачагы һәм Эль-Ниньо күренеше – Тын океандагы суның өске катламы җылынып, һава температурасына йогынты ясавы белән аңлата. 2017 елда да шул ук хәл күзәтелгән булган. Ул тарихка иң җылы ел булып кереп калган. 

– Климатның глобаль җылынуы безнең территориядә кыш айларының җылы килүендә чагыла. Әмма шулай да, актуаль фаразларга караганда, декабрь климатик нормадан түбәнрәк булачак, ягъни гадәттәгедән салкынрак булырга тиеш. Декабрь ае өчен норма -8 градус санала. Гомумән алганда, кыш контраст булыр дип көтелә. Декабрь салкынрак булса, февраль, киресенчә, нормадан җылырак булыр төсле. Февраль аеның нормасы – 9,6 грдаус салкынлык. Ә гыйнвар норма чикләрендә булачак – 10 градус тирәсе. Күпьеллык күзәтүләрдән чыгып карасак, кышлар карлы һәм кыскарак була бара, – дип сөйләде Тимур Әүхәдиев. 

Кыш кыска килсә дә, озака сузылмаган суыклары да булачак дип кисәтә ул. Кар юк дип тә борчылырга кирәкми. 

– Быел кар юк дию бик үк дөрес түгел. Карның декабрь аенда гына яуган еллар да булды. Хәтта ул елларда кар катламы нормадан да артып китә. Салкыннар тиз генә килмәгәч, кар төшәр өчен шартлар да булмады. Ә ул көттерми, бүген үк ява башлаячак, – дип сөендерде белгеч. 

Арча районы Ашытбаш авылында яшәүче халык синоптигы Рәис абый Шәкүров та кыш карлы булачак дип фаразлый. 
- 30 ноябрьләргә җирдә шыгырдап торган кар булачак. Чын кыш 1 декабрьдән башланырга тиеш. Сынамышларга караганда, кыш артык суык булмас. Әмма карлы булыр дип фаразлыйм. Һәрхәлдә, узган елгыдан күбрәк явачак. Зур көрәкләрегезне әзерләп куегыз, карны шактый көрисе була. Гыйнварда салкын көннәр дә булмыйча калмас. Әмма элеккеге кышлар юк инде ул хәзер. Сагынып сөйләргә генәк алды алар, – ди Әмир абый.

Әмма кыш кыска була дигән сүз белән килешеп бетми.

- Барыбер шул өч ай була инде ул. Кинәт кенә җылытмый бит, мартта җәй җитә алмый. Март аенда ташу аккан еллар бер-ике генә булды. Җылытып куйса да, салкын көннәр кире әйләнеп кайткалый, – ди ул.

Әмир абый әйтүенчә, киләсе җәй быелгысы кебек коры булмаячак. Икмәк уңышы да әйбәт булыр дип өметләник.