Көпә-көндез алдыйлар

2011 елда ТР Дәүләт алкоголь инспекциясенә 20004 кеше мөрәҗәгать иткән. Бу шикаятьләрнең сиксән проценттан артыгы сәүдә өлкәсендә кулланучыларның, ягъни сатып алучыларның хокуклары бозылуга бәйле. Ә калганнары исә көнкүреш һәм торак-коммуналь хезмәт күрсәтүләргә карый. Барлык язылган шикаятьләрнең туксан процентка якыны судка кадәр үк инде кулланучылар файдасына хәл ителгән.
Халык еш алдана, соңгы елларда бигрәк тә. Тагын шунысы да бар: күгәргән ипи сатып алып кына түгел, ә банклардан, үзләре дә чамаламыйча, зур процентлы кредит акчаларын алып та. «Татмедиа» басма һәм массакүләм коммуникацияләр буенча республика агентлыгында үткән брифингта ТР Дәүләт алкоголь инспекциясенең бүлек җитәкчесе Розалия Арсланова: «Иң еш алдану очраклары - көнкүреш техникасы, кәрәзле телефон, мебель һәм азык-төлек сатып алудан. Азык-төлек дигәндә, сөттән әзерләнгән ризыклар, ит, төрле тәм-томнар, яшь балалар өчен ашамлыклар күз алдында тотыла», - дип белдерде.