Кришна диненә күчкән Лилия Газизуллина: «Сыерлар өчен хоспис ачарга ниятлибез»

Лилия берничә ел элек кришна динен кабул иткән. Ә бу диндә сыерлар изге җан санала. Аларны хәтта әни кешеләргә тиңлиләр. Шуңа да сыерны «Гау Мата», ягъни «Әни-сыер» дип атыйлар. Һиндуизм мифларына караганда, вафат булган индус­ка, күккә күтәрелер өчен, елга аша үтәргә туры килгән. Имештер, бу фәкать сыер койрыгына ябышып кына мөмкин булган. Шуның өстенә ул кешеләргә сөт бирә, аларны тукландырып торучы санала.

- Сыерларны саклау белән без 2013 елдан бирле шөгыльләнәбез. Әлмәттә яшәүче фикердәшләребез өч сыерларын тотарга мөмкинлекләре булмавын хәбәр итеп, аларны кая да булса урнаштыру җаен эзләвебезне үтенде. Беребез дә анда барып яши алмый, барыбыз да шәһәр кешеләре. Озак кына уйлашканнан соң, аларны Юдинога алып кайттык. Монда яшәүче фикердәшебезнең шәхси йорты һәм җире бар. Шунда сыерлар өчен сарай төзедек. Тимер юлына терәлеп үк торганга, бистә халкына артык комачаулык итмибез. Әлмәтлеләрнең кул арты җиңел булды, өч ел дигәндә, сыерларның саны 24кә җитте. Сыерны суярга куллары күтәрелмәгән кешеләр дә, карт булганлыктан аларны сата алмаучылар да мөрәҗәгать итә. Башкортстаннан - сигез, Удмуртиядән - өч, Мари Элдан - ике, Чувашиядән шулай ике сыер алып кайттык. Безнең турында бик күп төбәкләр ишетеп белә булып чык­ты, - дип сөйләде безгә Лилия.

Кайберәүләр сыерларны бушка бирә, сатып бирүчеләре дә бар. Аларны алырга акчаны интернет ярдәмендә краудфандинг аша эз­лиләр. Хәйриячеләр дә булышып тора икән.

- Бер үгезне сатып алу 70 000 сумга, сыерлар кырыгар мең сумга төште. Бәяләре артып тора, 60 000 сумга сатучылар да бар. Аларны ашатырга көненә 900 сумлык бер бәйләм печән, 500 сумлык бер капчык икмәк тотыла. Җиребез зур булса, иренмичә, печәнне үзебез чәчәр идек тә, мөмкинлегебез юк шул. Сыерларның сөте күп түгел, бөтен булганын үзебезнең храмга тапшырабыз, - ди әңгәмәдәшем.
Гошалада (Лилия приютны шулай атый) терлекләр гомерләренең соңгы көннәренә кадәр асрала.

- Үлгәннән соң ниш­ләтәсез?
- Дин кануннары буенча, малның үз үлеме белән үлгәнен көтәләр, аннары яндыралар. Әлегә безнең сыерыбыз исән-сау. Кадер-хөрмәт күрсәтелгәч, үзләрен яхшы хис итәләр, авырып интектермиләр.

- Сыерларны сорап килүче булса бирәсезме?
- Киләчәктә аларны суймау шарты белән генә бирәбез.

- Биредә ничә кеше эшли?
- Дүрт волонтер булыша, изге эшкә бик теләп катнашалар.

Лилия һәр сыерга үз кушаматы белән эндәшә. Аларның барысы да изге сүзе белән бәйле: Ямуна, Лаванга, Ганга, Виджа, Гакула, Парватти, Лакшми... Болары истә калганнары, башкаларның кушаматларын әйтер өчен телеңне сындырырга кирәк.

Язга биредәге малкайларны Лаешка алып китәчәкләр икән. Кришна динен тотучы берәү аларга бер зур участок табып биргән.

- Ниятләребез зурдан. Анда 108 урынга исәпләнгән ферма (108 - алар өчен изге сан икән. - авт.), көтүчеләр өчен йорт, авыру, карт сыерлар өчен хоспис һәм ветеринария пункты төзеячәкбез, - дип планнары белән уртаклашты Лилия.

Әңгәмә барышында Юдинода кришна динен тоту­чыларның шактый булуы ачыкланды. Анда аларның храмнары да бар, ул Казанда бердәнбер санала. Бәйрәмнәрдә храмга бишәр йөз кеше җыела, диделәр безгә.

Илдар Мөхәммәтҗанов фотолары

ФОТОРЕПОРТАЖ