Лаешта Россиядә тиңе булмаган курорт барлыкка киләчәк

Татарстанның Туризм дәүләт комитеты рәисе Сергей Иванов сүзләренчә, узган елны Татарстан белән Корпорация арасында туризм, туристлык инфраструктурасы һәм кунакчыллык индустриясе өлкәсендә хезмәттәшлек итү турында килешү имзаланган булган. Лаеш районында төзеләчәк курорт - шуның нәтиҗәсе. 

— Республикада туризмны үстерү һәм туристларны җәлеп итү өчен ул бик мөһим һәм актуаль проект, - дип билгеләп үтте Сергей Иванов матбугат очрашуында.
Килешүгә Татарстанның дүрт муниципаль районында биш туристик-рекреацион кластер кертелгән: Спас, Югары Ослан, Кама Тамагы, Лаеш, шулай ук Казандагы «Казан термалары» күңел ачу, ял итү, рекреацион-савыктыру билгеләнешендәге күпфункцияле комплекс проекты. Соңрак  Корпорация вәкилләренең Татарстанга эш визиты нәтиҗәләре буенча Лаеш районында туристлык инфраструктурасы объектларын гамәлгә ашыру турында карар кабул ителгән. Һәм менә берничә елдан районда Россиядә тиңе булмаган туристлык территориясе барлыкка килер дип көтелә. 

Аның турында журналистларга "Туризм.РФ" корпорациясе генераль директорының беренче урынбасары Денис Секачев сөйләде.  
Яңа туристлык кластеры шул Лаештан берничә чакрым ераклыктагы "Кама диңгезе" ярында урнашачак. Әлегә аның эш атамасы “Лаеш” туристлык территориясе. Киләчәктә курорт башка исем алачак. 

Проект кысаларында 73 гектар мәйданда туристлар теләсә кайсы сезонда килә ала торган 3 һәм 4 йолдызлы кунакханәләр, СПА-үзәкләр, рестораннар, глэмпинглар һәм пляж ялы инфраструктурасы төзү күздә тотыла. Проектның үзенчәлеге - яхталар хуҗалары өчен махсус пристань төзеләчәк. Яхта һәм көймәләрне шунда ук кыш көне саклау мөмкинлеге дә булдырыла. Ял һәм күңел ачу өчен кырыктан артык сервис тәкъдим ителәчәк. 

—  Татарстанда яшәүчеләрнең ул иң яраткан урыны булырга тиеш, - диде Денис Секачев.

Быелның сентябрендә проектның мастер-планы расланып, 2024 елда төзелеш эшләре башланачак. Курорт исә ачкыч 2027 елда эшли башлар дип көтелә. 
Беренчел исәпләүләр буенча инвестицияләрнең гомуми күләме 16,1 миллиард сумнан артык тәшкил итәчәк. Фаразлар буенча, туристлык инфраструктурасын үстерү нәтиҗәсендә курортка елына 620 мең турист киләчәк. Яңа туристлык кластеры эшчәнлеген тәэмин итү өчен 1,5 мең эш урыны булдырылачак.

Фотолар: https://vk.com/public203424189