«Ничә елдан бирле йөреп, мондагы сатучылар үзебезнең туганнар кебек булып беттеләр инде»

Узган шимбәдә «Казан» агросәнәгать паркында «Татмелиорация» компаниясе, Мамадыш һәм Арча районнары фермерлары сәүдә итте. Премьер-министр урынбасары - республиканың сәнәгать һәм сәүдә министры Альберт Кәримов, Татарстан авыл хуҗалыгы һәм азык-төлек министрының терлекчелек буенча урынбасары Нәҗип Хаҗипов һәм «Татмелиорация» генераль директоры Әнвәр Залаков ярминкәдә йөреп, халык белән аралаштылар.

- 120 тонна ашлык, 120 тонна бәрәңге, бик күп яшелчә: кишер, кәбестә алып килдек. Шулай ук ит, сөтне дә халык яратып ала. Узган ярминкәдә барысын да сатып бетереп киткән идек, бу юлы да шулай булыр дип уйлыйм, - диде Әнвәр Залаков.

Ярминкәдә сөтнең литры - 28, бәрәңгенең килограммы - 11, суган - 13, кәбестә - 10, чөгендер - 12, кишер 13 сумнан сатылды.
Күргәнегезчә, бу башкала кибетләрендәге бәяләрдән шактый түбән.
- Очсыз бәядән сыйфатлы ризык алыйм дисәң, йоклап ятмаска кирәк. Бу ярминкәләр шәһәр халкы өчен бер дигән булды. Арча бәрәңгесе кирәкме, Сарман пилмәнен ашыйсыгыз киләме - бар да ал. Мин үзем агропромпаркка йөрим, - ди Гариф Галиев.

- Әй, кызым-җаным, ничә елдан бирле йөреп, мондагы сатучылар үзебезнең туганнар кебек булып беттеләр инде. Кайсы район киләсен дә алдан белеп торабыз. Бер бәйрәм кебек. Телисең икән, җыр тыңлап, коймак ашап урамда йөр, анда өшесәң, эчкә кер. Бүген үзебезнең мамадышлар килгән, авылдашларны күреп, авылга кайткан кебек булдым, - ди Разия апа Ганиева. Бу юлы ул кәбестә алырга дип махсус килгән булган.

«Бар җитештергән нәрсә үзебезнең совхозныкы. Бөтен традицион технология саклана, экологик яктан чиста. Пестицидлар кулланмыйбыз», - дип аңлатты сатып алучыларның күплеген аграрийларның берсе Сәет Низамов.