Нәүрүз бәйрәме – Урман көне

Быелдан башлап истәлекле көннәр календаре тагын бер үзенчәлекле бәйрәмгә байый бит әле. Яз көне без Урман көнен билгеләп үтәчәкбез. Халыкара Урман көнен гамәлгә кую идеясен БМО карамагындагы Бөтендөнья Азык-төлек һәм авыл хуҗалыгы оешмасы хуплап чыкты. Гамәлгә куелган Халыкара Урман көне әле төркиләр һәм иранлыларның Нәүрүзенә туры килә. Шул рәвешле, астрономик кояш календаре буенча төркиләр һәм иранлыларның Яңа елы - Нәүрүз көнендә тагын бер истәлекле дата гамәлгә куелды. Бу хакта ТР Урман хуҗалыгы министрлыгы хәбәр итә. Татарстан биләмәләренең бүген 17 проценттан артыгы - урманнар. Халыкара Урман көненең төп максаты исә - халыкның урман экосистемалары әһәмияте, аларның хәзерге хәле, аларны саклауда, үстерүдә һәм торгызуда төп чаралар турында мәгълүматлылыгын арттыру. Биологлар билгеләп үткәнчә, урман мәйданнарының кими баруы глобаль әһәмияттәге тискәре процессларга китерә. Нәтиҗә буларак, туфрак эрозиягә дучар була, үсемлекләр һәм хайваннар дөньясы төрлелеге кими, сулыклар, атмосфера һавасы пычрана, сәнәгать һәм ягулык максатларына ярашлы агач күләме кими.