«Рамазан аенда Ходай Тәгалә сәламәтлектән, балаларымнан аермасын да, «Шәһри Казан» килеп торсын дип телим»

- Беренче президентыбыз Минтимер Шәрип улы Шәймиев белән бер көнне тууым, якташы булуым белән бүгенге көнгә кадәр горурланып яшим.

1939 елның 20 гыйнварында Актаныш районы, Кәзкәй авылында туганмын. Миңа ике яшь чакта, әтием яу кырына китеп барган. Сугышның ахырына кадәр илебез азатлыгы өчен көрәшкән. 1945 елда, сугышчан батырлыклары өчен бирелгән медальләрен тагып, авылыбызга кайтты. Ләкин әниебез Бибитаҗибә һәм без балалары белән ике генә ел яшәп калды ул. Сугышта алган яралары аны арабыздан бик тиз алып китте. Әтисез тормыш җиңелләрдән булмады. 17 яшем тулгач, Казанга килдем, булачак ирем Рәшитем белән таныштым. Озак та үтми, аның белән матур гына тормыш корып җибәрдек.

Әфицеремә (тормыш иптәшемне яратып шулай дип атыйм) ямьле язның 9 маенда бер-бер артлы ике ул бүләк иттем. Үзем әтисез үсү генә җитмәгән, улларымны да сыңар канат белән ятим үстерергә язган икән. Пар канатлы булып озак яшәп булмады шул, Рәшитем вакытсыз гүр иясе булды. Аңардан соңгы бөтен гомеремне улларым Альберт белән Альфредка багышладым. Әтилеләрдән кимсенмәсеннәр дип, кая куйсалар, шунда көн дими, төн дими эшләдем. Лаеклы ялга дары заводыннан киттем. Аллага шөкер, улларым миһербанлы булдылар. Кызганыч, кече улым Альфредка да кыска гомер язган булган икән.

Бүгенге көндә улым Альберт, киленем Илһания һәм оныгым Рамил тәрбиясендә кадер-хөрмәттә яшәп ятам. Тамагым тук, урыным - түрдә.
Яшьләрнең үз тормышы, алар эштә чакта, ялгыз калган вакытлар да еш була. Шундый чакларда татарча газета-журналлар, бигрәк тә «Шәһри Казан» газетасын кулыма алып укый башлыйм да үземә иптәш табам. Кәефне күтәрерлек, күңелне юатырлык мәкаләләр күп басыла бу газетада. Инде 80 яшемне тутырырга да күп калмады. Рамазан аенда авыз ачканда, Ходай Тәгалә сәламәтлектән, балаларымнан аермасын да, «Шәһри Казан» килеп торсын дип телим. Аны чыгаруга күп көч куйган барлык хезмәткәрләргә иҗади уңышлар насыйп булсын. Үзегез дә, газетагыз да озын гомерле булыгыз!

***

#ПодпишиБлизких, #ПодпишиРодителей, #ПодпискаБүләкИт акциясе дәвам итә, икенче яртыеллыкка язылырга ашыгыгыз, хөрмәтле укучыларыбыз!