Свияжскида классик музыка бәйрәме уза

Әлеге фестивальнең Казан шәһәрендә Мәдәният елы кысаларында, ТР Мәдәният министрлыгы һәм ТР Дәүләт Киңәшчесе М.Ш.Шәймиев ярдәме белән узуын да әйтергә кирәк. «Музыка вокруг нас» мәдәни-агарту проектының төп максатлары - классик музыканы популярлаштыру, яңа талантларны ачу, Казан-Свияжск туристлык юнәлешен үстерү. Фестивальдә катнашучылар Россиянең Мәскәү, Санкт-Петербург, Екатеринбург, Казан кебек зур шәһәрләрен тәкъдим итәчәкләр. С.Сәйдәшев исемендәге дәүләт зур концертлар залында күренекле музыкантларның мастер-класслары да көтелә. Аерым алганда, 30 май көнне Санкт-Петербург Капелласы симфоник оркестры һәм хоры дирижеры Илья Дербилов белән Ярославль академия симфоник оркестры дирижеры Мурад Аннамамедов кыллы, тынлы, фортепиано һәм камералы ансамбльләр буенча мастер-класслар уздырачаклар. 1 июньдә исә Италия дирижеры Марко Боэми - вокалчылар, ә Н.Җиһанов исемендәге КДКның махсус фортепиано кафедрасы мөдире, профессор Әлфия Бурнашева пианистлар өчен мастер-класслар уздыра.
Фестивальнең ачылыш (30 майда 18.30 сәгатьтә) һәм ябылу (1июньдә) тантаналары С.Сәйдәшев исеменлдәге дәүләт зур концертлар залында узачак. Ә 31 май - Свияжскида фестиваль көне. Иртәнге 10.00 сәгатьтән кичке 20.00 сәгатькә кадәр бәйрәм гөрләячәк биредә. Фестивальдә катнашучылар белән бер сәхнәдә IV Бөтенроссия Г.Тукай исемендәге сәнгатьле укучылар бәйгесе җиңүчеләре дә чыгыш ясаячаклар.