Татарстан 12 илкүләм проектта катнаша

– Бу финанс чыганаклары сәламәтлек саклау өлкәсендә 375 бина төзүгә  һәм капиталь төзекләндерүгә тотылачак. Казан белән Чаллыда ике яңа мәктәп сафка бастырылачак, 50 парк һәм сквер яңартылачак, Казандагы канализация ләмен бетерү эшләре дәвам итәчәк. Республикада илкүләм проектларны гамәлгә ашыру Татарстан Рәисе Рөстәм Миңнеханов теләктәшлегендә һәм күзәтчелегендә алып барыла, – диде Татарстан премьер-министры урынбасары- икътисади үсеш министры Мидхәт Шаһиәхмәтов Хөкүмәт йортында узган брифингта. Россия Президенты Владимир Путин башлангычындагы илкүләм проектларның мөһимлеген искәртте ул. 

– Илкүләм проектлар илнең икътисадын үстерүгә, халыкның тормыш-көнкүрешен яхшыртуга юнәлтелгән. 2019-2024 еллар эчендә республикада илкүләм проектлар кысаларында 228 миллиард сумлык эшләр башкарылды. 27 мәктәп, 60 балалар бакчасы төзелде, 157 мәдәният һәм спорт корылмасы сафка бастырылды. Кече һәм урта эшкуарлыкка 316,2 миллиард сум ярдәм күрсәтелде. 357 мең кеше – үзмәшгуль, алардан 8 миллиард сум салым түләүләре керде. Кече һәм урта предприятиеләрдә 848 мең кеше эшли. “Химград”, “Саба”, “Теләче” сәнәгать парклары җитештерүчәнлек күрсәтә. Эшкуарлыкка ярдәм чаралары дәвам итәчәк, – диде Мидхәт Шаһиәхмәтов.

Муниципаль берәмлекләрдә 105 сәнәгать паркы оештырылды, аларда 1 726 предприятие эшчәнлек алып бара, 7 меңгә якын кешегә эш урыны барлыкка китерелгән.

– Татарстанда 46 төбәк программасы эшли. Болар: медицинаның беренчел звеносын үстерү, гаиләләргә һәм күп балалы гаиләләргә ярдәм, төзекләндерү һәм башкалар. Илкүләм проектлар төбәк проектлары аша гамәлгә ашырыла. “Озын гомер һәм актив тормыш”, “Гаилә”, “Кадрлар”, “Яшьләр һәм балалар” дигән яңа илкүләм проектлар старт алды, – диде Мидхәт Шаһиәхмәтов.

Республикада быел канализация челтәрләрен яңартуга федераль бюджеттан 3 миллиард 200 миллион сум бирелә. Татарстан Рәисе Рөстәм Миңнеханов башлангычында җир асты челтәрләрен төзекләндерүгә республика бюджетыннан 10 миллиард сум тәгаенләнгән.