Янартау безне көтә

Агымдагы елның 6-27 апрель көннәрендә «Реаспект» һәм «ЭкоСити» компанияләре хезмәттәшләре белән дусларыннан торган егерме кешелек төркем Евразиянең иң биек вулканы саналган Камчатка ярымутравындагы Ключевская янартавына менү буенча экспедиция оештыра.
Янартауга менүчеләргә, үз максатларына ирешү өчен, югарыга таба әллә ничә дистә километр үтәргә туры киләчәк. Ключевская янартавының биеклеге - диңгез өслегеннән 4850 метр. Моңа өстәп, андагы һава торышы шартларын, кислород җитмәүне дә исәпкә алсаң, максатка ирешү җиңел булмаячак.
Команда өчен бу мондый сәяхәтләрнең бердәнбере түгел. Узган елның июнь аенда алар Европаның иң биек ноктасына - Эльбрус тавына менде. Белгәнегезчә, Эльбрус тавы диңгез өслегеннән 5642 метр биеклектә. Аларның тауга менү барышы турында дистәләгән язма чыкты, интернетта хәбәрләр басылды.